پاک فوج اور کویتی مسلح افواج کے درمیان دفاعی تعاون مزید بڑھانے پر اتفاق

اسلام آباد(ڈیلی اردو) پاکستان اور کویت نے دفاعی شعبے میں تعاون کو مزید وسعت دینے کے لیے پروٹوکول ایگریمنٹ 2026ء پر دستخط کردیئے ہیں، جس کے تحت پاک فوج کویتی مسلح افواج کی تربیت، استعداد کار میں اضافے، سرحدی انتظام اور دیگر متفقہ دفاعی شعبوں میں معاونت فراہم کرے گی۔

کویتی وزیر دفاع شیخ عبداللہ علی عبداللہ السلیم الصباح کی قیادت میں اعلیٰ سطح کے وفد نے وزارت دفاع راولپنڈی میں وزیر دفاع خواجہ محمد آصف سے ملاقات کی۔ ملاقات میں دوطرفہ دفاعی تعلقات، سکیورٹی تعاون اور باہمی دلچسپی کے امور پر تبادلہ خیال کیا گیا، جس کے بعد نئے معاہدے پر دستخط کیے گئے۔

نیا معاہدہ 2023ء میں طے پانے والے دفاعی تعاون کے فریم ورک کو مزید وسعت دے گا۔ دونوں ممالک نے دفاعی شراکت داری، باہمی سلامتی اور علاقائی امن و استحکام کے لیے تعاون جاری رکھنے کے عزم کا اظہار کیا۔

کویتی وزیر دفاع کی آرمی چیف سے ملاقات

کویتی وزیر دفاع کی سربراہی میں وفد نے جنرل ہیڈ کوارٹرز (جی ایچ کیو) راولپنڈی کا بھی دورہ کیا، جہاں آرمی چیف و چیف آف ڈیفنس فورسز فیلڈ مارشل سید عاصم منیر سے ملاقات ہوئی۔

آئی ایس پی آر کے مطابق ملاقات میں علاقائی سلامتی، باہمی دلچسپی کے امور اور دفاعی تعاون کے مختلف پہلوؤں پر بات چیت ہوئی۔ دونوں جانب سے ادارہ جاتی روابط مزید مضبوط بنانے اور دفاعی تعاون کو وسعت دینے پر اتفاق کیا گیا۔

کویتی وفد نے علاقائی امن و استحکام کے لیے پاکستان کی مسلح افواج کی پیشہ ورانہ صلاحیتوں اور خدمات کو سراہا۔