پشاور: ارمڈو چوکی پر دہشت گردوں کی فائرنگ سے پولیس اہلکار ہلاک

پشاور (ڈیلی اردو) صوبہ خیبر پختونخوا کے دارالحکومت پشاور میں تھانہ ارمڑ کی پولیس چوکی ارمڈو پر نامعلوم دہشت گردوں کی فائرنگ سے ایک اہلکار ہلاک ہوگیا ہے۔

ڈیلی اردو کے مطابق ہلاک ہونے والے پولیس اہلکار کی شناخت سعید اللہ خان کے نام سے ہوئی جس کی نماز جنازہ ملک سعد پولیس لائن میں پورے سرکاری اعزاز کے ساتھ ادا کر دی گئی۔

نماز جنازہ میں کیپٹیل سٹی پولیس افسر (سی سی پی او) پشاور قاسم علی خان اور دیگر پولیس افسران ،اہلکاروں اور شہید کے لواحقین نے شرکت کی۔

پولیس کے چاق و چوبند دستے نے سلامی پیش کی اور پولیس افسران نے اہلکار کے تابوت پر پھول چڑھائے۔

پولیس کے مطابق گزشتہ رات نواحی علاقے ارمڑ میں پولیس چوکی ارنڈو پر دہشت گردوں نے اسنائپر گن سے فائرنگ کی تھی۔

پولیس نے بتایا کہ جوابی فائرنگ کے باعث دہشت گرد فرار ہوگئے تھے۔