پشاور میں سی ٹی ڈی کی کارروائی، کالعدم داعش کے 3 دہشت گرد گرفتار

پشاور (ڈیلی اردو) صوبہ خیبر پختونخوا کے صوبائی حکومت پشاور کے علاقہ پخہ غلام لطیف آباد میں کالعدم تنظیم داعش کے تین اہم کارکنان گرفتار کرلئے گئے۔

تفصیلات کے مطابق کاؤنٹر ٹیررازم ڈیپارٹمنٹ (سی ٹی ڈی) کی سپیشل ٹیم نے ایک بار پشاور شہر کو بڑی تباہی سے بچا لیا۔

اطلاع ملی کہ چند دہشتگرد دہشتگردی کی غرض سے پشاور شہر میں داخل ہو چکے ہیں۔

کاونٹر ٹیرارزم ڈیپارٹمنٹ کی سپیشل چھاپہ مار ٹیموں نے پخہ غلام چوک بطرف طارق اعوان روڈ لطیف آباد نہر کے قریب سے تین مشکوک افراد عطا اللہ سکنہ محلہ شریف آباد نمبر 2 وزیر باغ روڈ کا کشال محمد یوسف سکنہ برنگ درہ باجوڑ حال خراسان ہریانہ بالا پشاور اور یار محمد سکنہ سالار زئی باجوڑ حال بڈھ بیرکو روک کر تلاشی لی۔

دوران تلاشی دہشتگردوں کے قبضہ سے تین عدد ہینڈ گرنیڈ، تین عدد پستول 30 بور اور کافی مقدار میں کارتوس 30 بور برآمد کئے۔

سرسری انٹروگیٹ کرنے پر تینوں دہشتگردوں نے خود کو کالعدم تنظیم داعش کے کارندے بتایا۔