ایران کا کوہستک کے قریب امریکی ڈرون گرانے کا دعویٰ، جدید فضائی دفاعی نظام استعمال کرنے کا اعلان

کوہستک (ڈیلی اردو) ایران کی فوج نے دعویٰ کیا ہے کہ اس نے ملک کے جنوبی ساحلی علاقے کوہستک کے قریب ایک امریکی ایم کیو ون (MQ-1) ڈرون کو فضائی دفاعی نظام کے ذریعے نشانہ بنا کر تباہ کردیا ہے۔ ایرانی حکام کے مطابق کارروائی بحریہ کے جدید دفاعی نظام کی مدد سے کی گئی۔

ایرانی سرکاری خبر رساں ادارے ارنا کے مطابق ڈرون کو پہلے فضائی دفاعی نظام نے شناخت اور ٹریک کیا، جس کے بعد اسے نشانہ بنایا گیا۔ ادارے نے مبینہ طور پر تباہ کیے گئے ڈرون کی تصاویر بھی جاری کی ہیں، تاہم ان تصاویر اور طیارے کی شناخت کی آزادانہ طور پر تصدیق نہیں ہوسکی۔

امریکی سینٹرل کمانڈ (سینٹکام) کی جانب سے اس واقعے پر تاحال کوئی باضابطہ ردعمل سامنے نہیں آیا، اس لیے ڈرون کی تباہی سے متعلق ایرانی دعوے کی آزادانہ تصدیق ممکن نہیں ہوسکی۔

عالمی میڈیا کی رپورٹس کے مطابق آبنائے ہرمز اور اس کے اطراف امریکی ڈرونز کو نشانہ بنانے کے ایرانی دعوے پہلے بھی سامنے آتے رہے ہیں۔ خبر رساں ادارے رائٹرز نے 6 نومبر کو ایرانی میڈیا کے حوالے سے رپورٹ کیا تھا کہ پاسدارانِ انقلاب نے قشم جزیرے کے اوپر ایک امریکی ایم کیو ون ڈرون مار گرانے کا دعویٰ کیا، تاہم اس وقت بھی امریکہ نے اس کی تصدیق نہیں کی تھی۔

امریکی نشریاتی ادارے سی بی ایس نیوز نے ستمبر میں امریکی حکام کے حوالے سے بتایا تھا کہ ایرانی فورسز نے حالیہ دنوں میں کم از کم دو امریکی ایم کیو ون ڈرون تباہ کیے تھے۔ امریکی حکام نے اس وقت ڈرونز کے گرائے جانے کے درست مقامات اور ان کی اقسام کی مزید تفصیلات فراہم نہیں کی تھیں۔

ایم کیو ون امریکی ساختہ بغیر پائلٹ طیارہ ہے جسے نگرانی، انٹیلی جنس معلومات جمع کرنے اور ضرورت پڑنے پر حملوں کے لیے استعمال کیا جاسکتا ہے۔ کوہستک اور قشم کا علاقہ آبنائے ہرمز کے قریب واقع ہے، جو عالمی تجارت اور تیل کی ترسیل کے لیے انتہائی اہم سمندری گزرگاہ ہے۔