پشاور میں چیک پوسٹ اور پولیس گاڑی پر حملے، پولیس افسر سمیت متعدد اہلکار زخمی

اسلام آباد (ش ح ط) صوبہ خیبر پختونخوا کے صوبائی حکومت پشاور میں دو مختلف حملوں میں پولیس افسر سمیت متعدد اہلکار زخمی ہوگئے۔

تفصیلات کے مطابق پشاور کے علاقے بڈھ بیر میں نامعلوم افراد کا پولیس موبائل وین پر ہینڈ گرینڈ حملہ، سب انسپکٹر سمیت تین پولیس اہلکار زخمی ہوگئے۔ پولیس کا کہنا ہے کہ زخمیوں میں سب انسپکٹر فرید خان سمیت دو دیگر کانسٹیبل کو فوری طور پر ہسپتال منتقل کر دیا گیا جن کا علاج جاری ہے۔

https://twitter.com/ShabbirTuri/status/1483482322431352836?t=JkMQNcUuMigy6tcozNELtg&s=19

دوسری جانب حیات آباد انڈسٹریل پولیس چوکی پر نامعلوم افراد کا دستی بم حملہ ہوا ہے، پولیس کے مطابق حملے میں کوئی جانی نقصان نہیں ہوا،  ملزمان کی گرفتار ی کے لئے علاقے میں سرچ آپریشن شروع کردیا گیا۔ تاہم آزاد ذرائع کے مطابق حملے میں تین پولیس اہلکار زخمی ہوگئے ہیں۔

ایس ایس پی آپریشنز ہارون رشید نے ایل آر ایچ ہسپتال کا دورہ کیا جہاں پر بڈھ بیر حملے میں زخمی پولیس اہلکاروں کی عیادت کی، ایس ایس پی آپریشنز نے زخمیوں کو بہترین طبی سہولیات فراہم کرنے کی ہدایت کی۔

ایس ایس پی کے مطابق پولیس اہکار تھانہ بڈھ بیر کی حدود میں موبائل ڈیوٹی پر تھے، زخمیوں میں فرید خان، خواص خان اور میرعالم شامل ہیں، پولیس موبائل وین حملہ کے بعد بھاری نفری موقع پر پہنچی اور علاقے کو گھیرے میں لے کر ملزمان کی تلاش کے لئے وسیع پیمانے پر سرچ آپریشن شروع کردیا گیا ہے۔

دوسری جانب کالعدم تنظیم تحریک طالبان پاکستان نے حیات آباد حملے کی ذمہ داری قبول کرلی ہے۔ ترجمان نے دعویٰ کیا ہے کہ حملے میں تین اہلکار زخمی ہوگئے ہیں۔