پنجاب میں سی ٹی ڈی کی کارروائیاں، کالعدم تحریک طالبان پاکستان کے کمانڈر سمیت 7 دہشت گرد گرفتار

لاہور (بیورو رپورٹ) کاؤنٹر ٹیررزم ڈیپارٹمنٹ (سی ٹی ڈی) نے صوبہ پنجاب کے مختلف اضلاع میں کارروائیاں کرتے ہوئے کالعدم تحریک طالبان پاکستان (ٹی ٹی پی) کے کمانڈر سمیت 7 دہشت گردوں کو گرفتار کر لیا۔

ترجمان سی ٹی ڈی نے ڈیلی اردو کو بتایا کہ پنجاب کے مختلف شہروں میں انٹیلی جنس کی بنیاد پر 164 آپریشن کیے۔

مزید بتایا کہ جن شہروں میں آپریشن کیے گئے ہیں، ان میں لاہور، منڈی بہاؤ الدین، گوجرانوالہ، لیہ، ساہیوال، میانوالی اور بہاولپور شامل ہیں۔

ترجمان سی ٹی ڈی پنجاب کا کہنا تھا کہ بہاولپور سے ٹی ٹی پی کے اہم کمانڈر معاویہ کو گرفتار کیا گیا ہے۔

ترجمان کے مطابق گرفتار کئے گئے دیگر دہشت گردوں میں رحیم شاہ، عثمان، مرتضی حسن، عمر سعید، رحمت، کاشف اور حسنین شامل ہیں۔

انہوں نے مزید بتایا کہ دہشت گردوں سے دھماکہ خیز مواد، ہینڈ گرنیڈز، ڈیٹونیٹرز ،اسلحہ اور گولیاں برآمد کر کے تفتیش شروع کر دی گئی ہے۔