ڈاکٹر شاہنواز جعلی پولیس مقابلہ : ڈی آئی جی سمیت چار پولیس افسر اشتہاری قرار

کراچی (ڈیلی اردو) میرپورخاص کی انسدادِ دہشتگردی عدالت نے ڈاکٹر شاہنواز کنبہار کی مبینہ پولیس تحویل میں ہلاکت کے مقدمے میں ڈی آئی جی جاوید جسکانی، انسپکٹر عبدالستار سموں سمیت چار پولیس اہلکاروں کو اشتہاری قرار دے دیا۔ ایف آئی اے کے مطابق ملزمان کی گرفتاری کے لیے ان کے رہائشی پتوں پر چھاپے مارے گئے مگر کامیابی نہ مل سکی۔

عدالتی تحریری حکم میں کہا گیا کہ ایس ایس پی چوہدری اسد پاکستان کے زیرانتظام کشمیر اور اسلام آباد کے رہائشی ہیں، تاہم متعلقہ اضلاع کے ایس ایس پیز اس بات پر عدالت کو مطمئن نہ کر سکے کہ انہوں نے گرفتاری کے لیے کیا اقدامات کیے۔ وکیل مدعی ایڈووکیٹ ابراہیم کنبہار کے مطابق آئندہ سماعت پر متعلقہ ایس ایس پیز اپنی رپورٹ پیش کریں گے، جس کے بعد ان کے بارے میں فیصلہ سنایا جائے گا۔ سماعت 29 اگست تک ملتوی کر دی گئی۔

یاد رہے کہ عمرکوٹ سول اسپتال کے ڈاکٹر شاہنواز کنبہار پر ستمبر 2024 میں توہینِ مذہب کا مقدمہ درج ہوا تھا اور انہیں کراچی سے گرفتار کیا گیا تھا۔ بعد ازاں پولیس نے دعویٰ کیا کہ وہ ایک مقابلے کے دوران مارے گئے، تاہم تدفین کے موقع پر مشتعل افراد نے ورثا سے لاش چھین کر جلا دی تھی۔ اس واقعے پر سول سوسائٹی کے شدید احتجاج کے بعد حکومت سندھ نے اعلیٰ سطح کی تحقیقاتی کمیٹی تشکیل دی، جس نے 27 ستمبر کو اپنی رپورٹ میں بتایا کہ ڈاکٹر شاہنواز کو حراست میں لے کر جعلی مقابلے میں قتل کیا گیا۔ اس انکشاف پر ڈی آئی جی میرپورخاص، ایس ایس پی میرپورخاص اور ایس ایس پی عمرکوٹ کو معطل کر دیا گیا، مگر گرفتاری نہ ہونے پر ورثا اور انسانی حقوق کی تنظیموں نے سخت تحفظات ظاہر کیے۔

تحقیقات کے بعد ڈاکٹر شاہنواز کے قتل اور مبینہ جعلی مقابلے کے الزام میں پولیس افسران سمیت 45 افراد کے خلاف سندھڑی تھانے میں مقدمہ درج کیا گیا، جس میں قتل، انسداد دہشتگردی اور ہنگامہ آرائی کی دفعات شامل ہیں۔ مقدمے میں کہا گیا کہ مقتول کے جسم پر واضح تشدد کے نشانات تھے۔ مدعی نے الزام عائد کیا کہ پیر عمر جان سرہندی نے مشتعل احتجاج کے دوران خطاب کرتے ہوئے نہ صرف ڈاکٹر شاہنواز کی گرفتاری کا مطالبہ کیا بلکہ عوام کے مذہبی جذبات کو بھڑکایا۔