ڈیرہ اسماعیل خان: رکن صوبائی اسمبلی آغاز گنڈہ پور کے گھر پر فائرنگ، پولیس اہلکار ہلاک، دوسرا زخمی

ڈی آئی خان (ڈیلی اردو) خیبرپختونخوا اسمبلی میں پاکستان تحریک انصاف (پی ٹی آئی) کے رکن اسمبلی آغاز خان گنڈہ پور کے گھر پر فائرنگ کا واقعہ پیش آیا ہے۔

ڈیرہ اسماعیل خان کے ڈی پی او نجم الحسنین نے واقعے کی تصدیق کی اور بتایا کہ فائرنگ سے گیٹ پر تعینات دو کانسٹیبل زخمی ہوئے۔

پولیس حکام کے مطابق فائرنگ سے زخمی ہونے والا ایک پولیس اہلکار دم توڑ گیا ہے جبکہ دوسرے کو اسپتال منتقل کردیا گیا ہے۔

ڈی پی او نجم الحسنین کے مطابق فائرنگ کے وقت آغاز خان گنڈہ پور گھر پر موجود نہیں تھے۔

ڈی آئی خان کے ڈی پی او نے مزید کہا کہ علاقے کی ناکہ بندی کردی گئی ہے جبکہ ملزمان کی تلاش جاری ہے۔

واضح رہے کہ اس سے پہلے آغاز خان کے والد اور ممبر صوبائی اسمبلی اکرام خان گنڈہ پور اور سابق وزیر قانون اسرار خان گنڈہ پور کلاچی کے علاقے میں بم حملوں میں مارے جا چکے ہیں۔