کابل: اشرف غنی افغانستان کے دوبارہ صدر منتخب

کابل (ڈیلی اردو) افغان الیکشن کمیشن کی جانب سے جاری کردہ نتائج کے مطابق اشرف غنی 50 فیصد سے زائد ووٹ لے کر دوبارہ صدر منتخب ہوگئے ہیں جبکہ ان کے حریف عبداللہ عبداللہ کو 39 فیصد ووٹ ملے ہیں۔

غیر ملکی خبر رساں ادارے کی رپورٹ کے مطابق رواں برس 28 ستمبر کو افغانستان بھر میں صدارتی انتخاب کے لیے پولنگ ہوئی تھی جس کے ابتدائی نتائج کا اعلان اب کیا گیا ہے۔

https://twitter.com/WaliShabgeer/status/1208672920966483971?s=08

افغانستان الیکشن کے انتخابات کا نتیجہ
افغانستان کے قوانین کے مطابق کسی بھی امیدوار کو حتمی نتائج سے پہلے کسی بھی قسم کی شکایت یا درخواست دائر کرنے کا حق حاصل ہے۔

واضح رہے کہ افغانستان کے گزشتہ انتخابات میں بھی دھاندلی کے الزامات سامنے آئے تھے، صدارتی امیدوار عبداللہ عبداللہ نے نتائج ماننے سے انکار کردیا تھا تاہم عالمی قوتوں نے دونوں کے درمیان شراکت اقتدار کا معاہدہ کرایا تھا جس کے تحت اشرف غنی صدر بنے تھے جب کہ عبداللہ عبداللہ کو چیف ایگزیکٹیو کا عہدہ تفویض کیا گیا تھا۔

افغان صدر اشرف غنی کے ووٹوں کی تعداد 9 لاکھ 23 ہزار سے زائد ہے جبکہ چیف ایگزیکٹو عبداللہ عبداللہ دوسری پوزیشن پر ہیں، ان کے ووٹوں کی تعداد 7 لاکھ 20 ہزار 99 ہے۔

گلبدین حکمت یار تیسری پوزیشن کے ساتھ 70 ہزار 243 ووٹ حاصل کر سکے، گلبدین حکمت یار نے انتخابی نتائج مسترد کر دیئے۔

افغانستان میں انتخابات ستمبر میں ہوئے تھے، جس کے نتائج 3 ماہ بعد آئے۔