کراچی میں پولیس اور حساس اداروں کا آپریشن، بھارتی خفیہ ایجنسی ’را‘ کے 2 دہشت گرفتار

کراچی (ڈیلی اردو) صوبہ سندھ کے صوبائی دارالحکومت کراچی میں حساس اداروں اور پولیس نے مشترکہ طور پر ٹارگیٹڈ آپریشن کرتے ہوئے بھارتی خفیہ ایجنسی ’را‘ سے تعلق رکھنے والے دو دہشت گردوں کو گرفتار کرلیا۔

ایس ایس پی کورنگی حسن سردار کے مطابق کورنگی صنعتی ایریا پولیس اور حساس اداروں کی مشترکہ ٹارگیٹڈ کارروائی میں بھارتی خفیہ ایجنسی ’را‘ کے 2 دہشت گرد گرفتار کیے گئے ہیں۔

حسن سردار کے مطابق کورنگی پولیس نے شہر میں دہشت گردی کا بڑا منصوبہ ناکام بنادیا ہے۔

ایس ایس پی پولیس نے مزید کہا کہ گرفتار ملزمان کی شناخت خاور حسین اور جابر کے نام سے ہوئی ہے جن سے 2 دستی بم، 9 ایم ایم پستول اور گولیاں برآمد کی گئیں۔

ایس ایس پی کورنگی کا کہنا تھا کہ ملزمان سے تفتیش کے دوران اہم انکشافات سامنے آئے ہیں۔

ان کا کہنا تھا کہ ملزمان بیرون ملک سے ملنے والے ٹارگٹ کی ریکی کرتے تھے، ملزمان ہدف کی تفصیلات اور تصاویر بیرون ملک بھیجتے تھے۔

انہوں نے بتایا کہ ملزمان کو غیر ملکی اکاؤنٹس سے لاکھوں روپے موصول ہوچکے ہیں، ملزمان سے تفتیش جاری ہے اور مزید انکشافات متوقع ہیں۔