کراچی میں پولیس موبائل سے منشیات کی بڑی مقدار برآمد، 6 اہلکار گرفتار

کراچی (ڈیلی اردو) کراچی میں رینجرز نے سی آئی اے جامشورو پولیس کے 6 اہلکاروں کو گرفتار کر کے منشیات کی بھاری مقدار برآمد کرلی۔

تفصیلات کے مطابق 5 روز قبل سی آئی اے جامشورو نے مزدا ٹرک کے اضافی ڈیزل ٹینک سے منشیات کی بھاری مقدار برآمد کی تھی۔ اس کارروائی میں منشیات کے دو اسمگلر گرفتار کیے گئے اور مقدمہ بھی درج ہوا۔

ذرائع کے مطابق پکڑے جانے والے اسمگلروں کے بعض ساتھیوں نے پولیس کو پکڑی گئی منشیات بیچنے کی پیشکش کی۔

سی آئی اے جامشورو نے کچھ منشیات فروخت کرنے پر رضامندی ضاہر کر دی تو اسمگلروں نے 76 کلو منشیات کراچی پہنچانے کا کہا۔

جامشورو کی پولیس پارٹی اپنے ایک افسر کے ہمراہ منشیات پہنچانے کراچی آئی تو اسمگلرز منشیات سے بھری پولیس موبائل کو کلفٹن لے گئے اسی دوران سندھ رینجرز وہاں پہنچ گئی اور پولیس اہلکار دھر لئے گئے۔