کراچی: پولیس موبائل پر فائرنگ اسٹریٹ کرائم نہیں، دہشت گردی کی بڑی واردات نکلی

کراچی (ڈیلی اردو) کراچی کے علاقے فیڈرل بی ایریا بلاک 22 میں گزشتہ روز ہونے والی پولیس موبائل پر فائرنگ سے متعلق اہم انکشافات سامنے آئے ہیں۔

اس حوالے سے پولیس ذرائع کا کہنا ہے کہ واقعہ اسٹریٹ کرائم نہیں بلکہ منظم دہشت گردی کی بڑی واردات نکلی، چلتی پولیس موبائل پر حملے کی سی سی ٹی وی فوٹیج سامنے آگئی۔ جس میں پولیس اہلکاروں کو گاڑی بھگا کر لے جاتے جب کہ دہشت گردوں کو پولیس کی گاڑی کے پیچھے بھاگ بھاگ کر فائرنگ کرتے دیکھا جا سکتا ہے۔

https://twitter.com/ShabbirTuri/status/1498596210063466500?t=_RKbUCprVjjUbJeNleKLqw&s=19

واقعہ کے بعد پولیس نے اسے اسٹریٹ کرائم کی عام واردات قرار دیا تھا، فوٹیج میں تین موٹر سائیکلوں پر سوار 5 ملزمان کو پولیس موبائل کو نشانہ بناتے دیکھا جاسکتا ہے جبکہ ملزمان سڑک پر کھلے عام پولیس موبائل کا راستہ روک کر فائرنگ کرتے نظر آتے ہیں۔

فوٹیج میں دیکھا جا سکتا ہے کہ پولیس اہلکاروں کو حملہ آوروں پر جوابی فائرنگ کا موقع ہی نہ ملا اور انہوں نے راہ فرار اختیار کی جبکہ پانچ حملہ آوروں میں سے تین نے ہیلمٹ لگا رکھے تھے۔

سی سی ٹی وی فوٹیج کے مطابق فوٹیج میں سیاہ کوٹ پینٹ اور ٹائی پہنے بیگ پکڑے ملزم کو بھی فائرنگ کرتے دیکھا جاسکتا ہے۔

واضح رہے کہ ایف بی انڈسٹریل ایریا میں پولیس موبائل پر حملہ صبح 11 بج کر 2 منٹ پر کیا گیا، فوٹیج کے مطابق پولیس موبائل نے جیسے ہی موڑ کاٹا وہاں موجود ملزم نے موٹر سائیکل سے اتر کر فائرنگ کی۔

فائرنگ کرنے والے ملزمان کو پولیس کے تعاقب میں بھاگتے فائرنگ کرتے دیکھا جا سکتا ہے۔ ملزم کے ساتھیوں نے بھی موٹر سائیکلوں سے اتر کر پولیس موبائل پر فائرنگ کی۔ فائرنگ کے بعد پانچوں ملزمان باآسانی فرار ہونے میں کامیاب ہوگئے۔

ذرائع کے مطابق پولیس موبائل پر فائرنگ سے پولیس اہلکار سمیت 3 افراد زخمی ہوئے، واقعے کے بعد زخمی ہونے والے افراد کو تشویشناک حالت میں مقامی ہسپتال پہنچایا گیا، زخمی اہلکار کو 3 گولیاں لگیں، ڈاکٹروں نے اہلکار کو انتہائی نگہداشت کے وارڈ میں منتقل کردیا تاہم زخمی پولیس اہلکار کی حالت خطرے سے باہر ہے۔

فائرنگ کے واقعے پر سی ٹی ڈی حکام نے بھی تحقیقات شروع کردی ہیں، تاہم واقعے کا مقدمہ تاحال درج نہیں کیا گیا ہے، ذرائع کے مطابق مقدمہ درج ہونے پر تحقیقات سی ٹی ڈی کو منتقل کی جاسکتی ہیں۔