کرم میں دہشت گردوں کا تورغر چیک پوسٹ پر حملہ، سیکیورٹی فورسز کے 5 اہلکار زخمی

اسلام آباد (ش ح ط) صوبہ خیبر پختونخوا کے قبائلی ضلع کرم میں پاک افغان سرحد کے قریب سیکورٹی فورسز کے چیک پوسٹ پر دہشت گردوں کے حملے میں پانچ اہلکار زخمی ہوگئے۔

سرکاری ذرائع کے مطابق رات گئے دہشت گردوں نے سینٹرل کرم کے علاقے مسوزئی میں تورغر چیک پوسٹ پر حملہ کیا۔

ذرائع کے مطابق دہشت گردوں نے سکیورٹی فورسز کی چیک پوسٹ پر فائرنگ کی جس سے وہاں تعینات پانچ اہلکار زخمی ہوگئے۔

سکیورٹی فورسز اور مسلح دہشت گردوں کے درمیان فائرنگ کا تبادلہ بھی ہوا ہے اور جوابی کارروائی سے حملہ آور فرار ہو گئے۔

مقامی ذرائع کا کہنا ہے کہ واقعے کے بعد سکیورٹی فورسز نے جائے وقوعہ اور اردگرد کے علاقوں میں سرچ آپریشن کا آغاز کردیا ہے۔