کرم: پاراچنار میں فائرنگ کے تبادلے میں کالعدم زینبیون بریگیڈ کا دہشت گرد گرفتار

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع کرم میں پولیس نے ایک کارروائی کے دوران ایرانی حمایت یافتہ کالعدم تنظیم کے ایک مبینہ دہشت گرد کو گرفتار کر لیا ہے۔

کرم پولیس کے مطابق 21 اپریل کو شلوزان شین خواڑ کے قریب روڈ پروٹیکشن فورس کے اہلکار پر فائرنگ کے واقعے میں ملوث مرکزی ملزم کو گرفتار کیا گیا ہے۔

پولیس کا کہنا ہے کہ گرفتار ملزم سید جلیل کا تعلق کالعدم تنظیم زینبیون بریگیڈ سے بتایا جاتا ہے۔ ملزم کو لقمان خیل چیک پوسٹ پر کارروائی کے دوران حراست میں لیا گیا، جس کے قبضے سے ایک پستول اور ہینڈ گرنیڈ بھی برآمد ہوا۔

پولیس کے مطابق گرفتاری کے دوران ملزم نے پولیس پارٹی پر ہینڈ گرنیڈ پھینکا اور فائرنگ بھی کی، تاہم کوئی جانی نقصان نہیں ہوا اور پولیس اہلکار محفوظ رہے۔ بعد ازاں ملزم کو گرفتار کر کے تھانہ سٹی منتقل کر دیا گیا۔

ڈسٹرکٹ پولیس آفیسر کرم ملک حبیب خان کے مطابق واقعے کی مزید تفتیش جاری ہے، جبکہ سیکیورٹی فورسز کو نشانہ بنانے والے عناصر کے خلاف کارروائیاں مزید سخت کی جائیں گی۔۔