کرم: پاراچنار کے نواحی گاؤں پیواڑ میں فائرنگ، صوبیدار ہلاک، 2 سویلین زخمی

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم کے صدر مقام پاراچنار کے نواحی گاؤں میں نامعلوم مسلح افراد نے سیکیورٹی فورسز پر فائرنگ کردی جس کے نتیجے میں صوبیدار ہلاک جبکہ دو سویلین زخمی ہوگئے۔

تفصیلات کے مطابق پاراچنار کے نواحی گاؤں پیواڑ میں نامعلوم مسلح افراد کی فائرنگ سے سیکورٹی فورسز کا صوبیدار رحمان ہلاک ہوگیا جبکہ دو سویلین فدا حسین اور تیمور علی زخمی ہوگئے۔ جبکہ فائرنگ کے بعد حملہ آور کھیتوں میں فرار ہوگئے۔

واقعے کی اطلاع ملتے ہی پولیس، سیکورٹی فورسز اور ریسکیو کی ٹیمیں جائے وقوع پر پہنچیں اور فائرنگ کا نشانہ بننے والے شہریوں کو ہسپتال منتقل کردیا۔

پولیس کےمطابق فرار نامعلوم ملزمان کی گرفتاری کیلئے جائے وقوعہ کے گردونواح میں پولیس اور سیکورٹی فورسز کا سرچ آپریشن جاری ہے۔