کوہاٹ میں پولیس گاڑی پر طالبان کا حملہ، ڈی ایس پی سمیت 7 اہلکار ہلاک، 4 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع کوہاٹ میں پاکستانی طالبان کے حملے میں ڈی ایس پی سمیت 7 پولیس اہلکار ہلاک جبکہ 4 زخمی ہوگئے۔

ڈیلی اردو کو پولیس حکام نے بتایا کہ کوہاٹ میں شکردرہ روڈ پر کالعدم تحریک طالبان پاکستان (ٹی ٹی پی) کے مسلح افراد کی فائرنگ کے نتیجے میں ڈی ایس پی اسد محمود خان اور سب انسپکٹر انار گل سمیت 7 اہلکار ہلاک جبکہ 4 زخمی ہوگئے، جن میں سے بعض کی حالت تشویشناک بتائی جاتی ہے۔

پولیس ذرائع کے مطابق حملہ اس وقت کیا گیا جب پولیس کی گاڑی معمول کی گشت پر تھی۔ دہشت گردانہ حملے میں ہلاک ہونے والوں میں ڈی ایس پی کے دو پرائیویٹ گن مین بھی شامل ہیں۔

واقعے میں ایک زیرِ حراست ملزم بھی ہلاک ہوگیا۔

پولیس حکام کا کہنا ہے کہ حملہ آور واردات کے بعد فرار ہوگئے، جبکہ بعض اہلکاروں کی لاشوں کو بھی آگ لگا دی گئی۔ 

علاقے کو گھیرے میں لے کر سرچ آپریشن شروع کر دیا گیا ہے۔