کوہاٹ: پولیس اور سی ٹی ڈی کے اپنے اہلکار ہی دہشت گرد نکلے، سنسنی خیز انکشافات

واشنگٹن (ش ح ط ) پاکستان کے شورش زدہ صوبے خیبرپختونخوا کے ضلع کوہاٹ میں پولیس اور کاؤنٹر ٹیررازم ڈیپارٹمنٹ (سی ٹی ڈی) کی مشترکہ کارروائی میں دو بارودی دہشت گرد اہلکار گرفتار کر لیے گئے، جو کالعدم تنظیم تحریک طالبان پاکستان (ٹی ٹی پی) سے روابط رکھتے تھے۔

ریجنل پولیس افسر (آر پی او) کوہاٹ عباس مجید مروت نے ڈی پی او ڈاکٹر زاہد اللہ اور ایس پی سی ٹی ڈی سعادات خان کے ہمراہ پریس کانفرنس میں انکشاف کیا کہ گرفتار ملزمان میں ایک کوہاٹ پولیس کا سپاہی سراج اور دوسرا سی ٹی ڈی کا اہلکار فریدون شامل ہے۔ دونوں نہ صرف دہشت گرد بلکہ کالعدم تنظیم کے سہولتکار بھی ہیں۔

آر پی او کے مطابق دورانِ تفتیش ملزمان نے انکشاف کیا کہ وہ محرم الحرام کے دوران نویں اور دسویں محرم کے جلوسوں، پولیس کے دس سینئر افسران، پولیس لائنز کی مسجد (پشاور پولیس لائن حملے کی طرز پر)، تھانہ سی ٹی ڈی اور دیگر سرکاری عمارتوں پر بم دھماکوں کے علاوہ چہلم امام حسینؑ کے جلوسوں کو نشانہ بنانے کا منصوبہ رکھتے تھے۔

گرفتار ملزمان نے اپنے جرائم کا اعتراف کر لیا ہے اور عدالت سے ان کا 15 روزہ جسمانی ریمانڈ حاصل کر لیا گیا ہے۔ پولیس حکام کے مطابق مزید تفتیش جاری ہے اور توقع ہے کہ دونوں بارودی دہشت گرد اہلکاروں سے مزید سنسنی خیز انکشافات سامنے آئیں گے۔