گاڑی پر راکٹ حملہ: پی ٹی آئی کےتحصیل ناظم عاطف خان جدون سمیت 8 افراد ہلاک

ایبٹ آباد (ڈیلی اردو) خیبر پختونخوا کے ضلع ایبٹ آباد میں راکٹ لانچر حملے میں تحصیل حویلیاں کے چیئرمین عاطف خان جدون 8 محافظوں سمیت ہلاک ہوگئے۔

https://twitter.com/Natsecjeff/status/1637828405096767488?t=fjGhLyOa-7bV8nsY5yXeZg&s=19

پولیس کے مطابق حویلیاں کے گاؤں لنگڑا میں مخالف گروپ چھپ کر بیٹھا تھا اور جب پی ٹی آئی تحصیل ناظم عاطف منصف خان کی گاڑی وہاں سے گزری تو اس پر فائرنگ شروع کردی۔

پولیس کے مطابق فائرنگ کی وجہ سے گاڑی میں آگ لگ گئی جس کے نتیجے میں تحصیل ناظم سمیت 8 افراد ہلاک ہوگئے۔

پولیس کا کہنا ہے کہ آگ لگنے کی وجہ سے گاڑی مکمل طور پر تباہ ہوگئی ہے جب کہ زخمی ہونے والے 2 افراد کو قریبی ہسپتال منتقل کیا گیا ہے۔

ڈسٹرکٹ پولیس افسر (ڈی پی او) ایبٹ آباد عمر طفیل نے کہا کہ سوشل میڈیا پر یہ خبر گردش کرنے لگی کہ کسی سیاسی رہنما کی گاڑی کو آگ لگ گئی ہے اور جب پولیس، فائر برگیڈ کا عملہ وہاں پہنچا تو تحصیل ناظم سمیت 6 افراد اللہ کو پیارے ہو چکے تھے۔

ڈی پی او ایبٹ آباد پولیس کے ہمراہ موقع پر پہنچ گئے اور پولیس کی بھاری نفری تعینات کر دی گئی جب کہ لاشوں کو پوسٹ مارٹم کے لیے ڈی ایچ کیو ہسپتال منتقل کر دیا گیا۔

ابھی تک ایف آئی آر درج نہیں ہوسکی تاہم پولیس نے ملزمان کی گرفتاری کے لیے سرچ آپریشن شروع کردیا۔

دسٹرکٹ پولیس افسر عمر طفیل نے کہا کہ پی ٹی آئی کے تحصیل ناظم حویلیاں عاطف منصف خان کی گاڑی پر فائرنگ سے گاڑی میں آگ لگ گئی جس کے نتیجے میں تحصیل ناظم سمیت 8 افراد جل کر ہلاک ہوگئے۔

ڈی پی او نے کہا کہ ہلاک ہونے والوں میں عاطف منصف خان بھی شامل ہیں اور آگ سے گاڑی مکمل جل گئی ہے جس میں آٹھ افراد سوار تھے۔

ڈی پی او عمر طفیل نے کہا کہ فائرنگ سے گاڑی میں آگ لگ گئی اور گاڑی کے دروازے توڑ کر لاشوں لاشیں نکالی گئیں۔

خیال رہے کہ بستی شیر خان کے عاطف منصف خان سابق صوبائی وزیر منصف خان جدون کے بیٹے تھے اور 2022 کے بلدیاتی الیکشن میں آزاد حیثیت سے تحصیل ناظم منتخب ہوئے تھے۔

عاطف منصف خان بلدیاتی انتخابات سے چند روز قبل جیل سے رہا ہوئے تھے اور اس وقت عوام کی بڑی تعداد نے ان کی رہائی کا خیر مقدم کیا تھا اور بعدازاں بلدیاتی الیکشن میں انہوں نے مسلم لیگ (ن) اور پی ٹی آئی کے مضبوط گروپوں کو بھاری مارجن سے شکست دی تھی۔

حال ہی میں انہوں نے پی ٹی آئی میں شمولیت اختیار کی تھی علاقے میں متحرک کارکن تھے جن پر سب کا اتفاق تھا۔

عاطف منصف خان ہر مقامی تقریبات میں شرکت کرنے خاص طور پر اموات اور شادیوں میں جانے اور عام لوگوں کے مسائل کے حل کے لیے جانے جاتے تھے۔

علاقے میں دو مضبوط حریف گروپ ہیں جن میں سے ایک منصف خان فیملی اور دوسری بلند خان فیملی ہے اور اب تک دونوں طرف سے کم از کم دو درجن سے زائد افراد اس دشمنی میں جان کی بازی ہار چکے ہیں، ڈی پی او کی جانب سے واضح کیا گیا کہ دونوں گروپوں کے درمیان پرانی دشمنی ہے۔