یمن حوثیوں کا میزائل اسرائیل نے فضاء میں تباہ کر دیا

تل ابیب/غزہ (ڈیلی اردو/نیوز ایجنسیاں) اسرائیلی فوج کے مطابق یمن سے فائر کیا گیا ایک میزائل فضاء میں ہی ناکارہ بنا دیا گیا۔

عرب میڈیا کے مطابق میزائل داغے جانے سے قبل اسرائیل کے مختلف علاقوں میں سائرن بجنے لگے، تاہم اس حملے میں کسی جانی نقصان کی اطلاع نہیں ملی۔ ابھی تک کسی گروپ نے اس کارروائی کی ذمہ داری قبول نہیں کی، تاہم ماضی میں یمن کے حوثی باغی غزہ پر اسرائیلی حملوں کے ردعمل میں اسرائیل پر متعدد میزائل اور ڈرون حملے کر چکے ہیں۔

7 اکتوبر 2023 کے بعد سے حوثیوں نے حماس کی حمایت میں اسرائیل کے خلاف حملوں کا سلسلہ تیز کر دیا ہے۔

دوسری جانب اسرائیل نے غزہ پر ممکنہ زمینی قبضے کی تیاری کے لیے سرحدی علاقوں میں مزید فوجی کمک تعینات کر دی ہے۔

غزہ میں اسرائیلی فضائی بمباری کے تازہ سلسلے میں 60 سے زائد فلسطینی ہلاک ہوگئے۔ اسی کے ساتھ غذائی قلت کے باعث مزید 3 اموات کے بعد قحط سے ہلاک ہونے والوں کی تعداد بڑھ کر 303 ہو چکی ہے۔