یوکرین پر روس کے بڑے فضائی حملوں میں 6 افراد ہلاک، 27 زخمی

کییف (ڈیلی اردو/ڈی پی اے) روسی یوکرینی جنگ میں ماسکو نے گزشتہ رات کییف پر بڑے فضائی حملے کیے، جن میں کم از کم چھ افراد ہلاک اور 27 زخمی ہو گئے۔ میزائلوں اور سینکڑوں ڈرونز کے ساتھ کیے گئے ان حملوں کے بعد کییف شہر کے مختلف حصوں میں آگ بھی لگ گئی۔

یوکرینی دارالحکومت سے جمعہ 14 نومبر کو ملنے والی رپورٹوں کے مطابق روس کی مسلح افواج نے کییف پر یہ وسیع تر فضائی حملے جمعرات اور جمعے کی درمیانی شب کیے۔

کییف کی فوجی انتظامیہ کے سربراہ تیمور تکاچینکو نے نیوز ایجنسی ایسوسی ایٹڈ پریس کو بتایا کہ روس نے گزشتہ رات یوکرین پر 18 میزائلوں اور کم از کم 430 جنگی ڈرونرز کے ساتھ حملے کیے، جن میں کییف کے علاوہ یوکرین کے دیگر شہروں کو بھی نشانہ بنایا گیا۔

ان حملوں کے بعد یوکرینی صدر وولودیمیر زیلنسکی نے کہا کہ تازہ ترین روسی حملوں میں کم از کم چھ یوکرینی باشندے ہلاک اور 27 دیگر زخمی ہو گئے۔ صدر زیلنسکی کے بقول، ’’ان حملوں کا ہدف خاص طور پر دارالحکومت کییف تھا، تاکہ وہاں شہری زندگیوں اور املاک کو زیادہ سے زیادہ نقصان پہنچایا جا سکے۔‘‘

اسی دوران صدر زیلنسکی نے سوشل میڈیا پلیٹ فارم ٹیلیگرام پر ایک پوسٹ میں یہ بھی کہا کہ کییف شہر میں روس کے اسکندر طرز کے ایک میزائل کے ٹکڑے لگنے کی وجہ سے آذربائیجان کے سفارت خانے کی عمارت کو بھی نقصان پہنچا۔

دریں اثناء روس نے دعویٰ کیا ہے کہ اس کی فورسز نے جوابی حملوں کے لیے یوکرین کی طرف سے بھیجے گئے 216 جنگی ڈرونز مارے گرائے۔

روسی حکام کے مطابق ان یوکرینی ڈرونز کے ساتھ مختلف علاقوں میں خاص طور پر روسی تیل کی ایسی تنصیبات کو نشانہ بنانے کی کوشش کی گئی، جن میں آئل ریفائنریاں اور آئل ڈپو شامل تھے۔