حکومت کا ایف سی کو ملک گیر "فیڈرل فورس" میں تبدیل کرنے کا فیصلہ

اسلام آباد (ڈیلی اردو) وفاقی حکومت نے فرنٹیئر کانسٹیبلری (ایف سی) کو ملک گیر دائرہ اختیار والی فیڈرل فورس میں تبدیل کرنے کا فیصلہ کرلیا ہے۔ 

ذرائع کے مطابق، کابینہ نے اس حوالے سے فرنٹیئر کانسٹیبلری ایکٹ 1915 میں ترمیم کی منظوری دے دی ہے، جس کے بعد "فیڈرل کانسٹیبلری" کے نام سے نئی فورس قائم کی جائے گی۔ اس نئی فورس کو چاروں صوبوں، اسلام آباد، آزاد کشمیر اور گلگت بلتستان میں کام کرنے کا مکمل اختیار حاصل ہوگا۔

 ملک بھر میں دفاتر اور نئی بھرتیاں کی جائیں گی جبکہ کمان پولیس سروس آف پاکستان کے افسران سنبھالیں گے۔ ذرائع کا کہنا ہے کہ اس فیصلے کا مقصد ملک میں داخلی سلامتی کو مرکزی سطح پر مؤثر بنانا اور امن و امان کے قیام کو مضبوط بنانا ہے۔ آرڈیننس کے نفاذ کے بعد، نئی تنظیم نو کے تحت فیڈرل کانسٹیبلری نہ صرف موجودہ چیلنجز سے نمٹنے کی بہتر صلاحیت رکھے گی بلکہ وفاقی سطح پر ایک مربوط سیکیورٹی فریم ورک کا حصہ بھی بن جائے گی۔