آندھرا پردیش میں جیشِ محمد سے روابط کے الزام میں دو افراد گرفتار

دہلی (ڈیلی اردو) بھارتی ریاست آندھرا پردیش کے ضلع سری ستیا سائی میں پولیس نے پاکستان نواز شدت پسند تنظیم جیشِ محمد (JeM) سے مبینہ روابط کے الزام میں دو افراد کو گرفتار کیا ہے۔ گرفتار ہونے والوں کی شناخت سجاد حسین، ساکن امروہہ (اتر پردیش) اور توقیق عالم شیخ، ساکن مالیگاؤں (مہاراشٹر) کے طور پر ہوئی ہے۔

 پولیس کے مطابق دونوں افراد جیشِ محمد کے واٹس ایپ گروپس میں سرگرم تھے اور تنظیم کے معروف رکن طلحہ بھائی سے رابطے میں تھے جو مبینہ طور پر مولانا مسعود اظہر کا بھائی ہے۔ ملزمان کے قبضے سے الیکٹرانک آلات، انتہا پسندی سے متعلق مواد اور ایک سنگل بیرل رائفل برآمد ہوئی ہے۔ ان کے خلاف مقدمہ درج کر کے عدالت میں پیش کر دیا گیا ہے اور تفتیشی ٹیم انہیں مزید تحقیقات کے لیے ڈھرمورم منتقل کر چکی ہے۔

 پولیس کا کہنا ہے کہ گرفتار شدگان بھارت میں نوجوانوں کو عسکری تربیت کے لیے پاکستان بھیجنے اور شدت پسند کارروائیوں میں ملوث کرنے کی کوشش میں تھے، جب کہ عوام کو انتباہ جاری کیا گیا ہے کہ انتہا پسند سوشل میڈیا نیٹ ورکس سے تعلق رکھنے والوں کے خلاف سخت کارروائی کی جائے گی۔