اسرائیل نے اسلحہ سمگل کرنے کے الزام میں اردن کے رکنِ پارلیمان کو گرفتار کرلیا

عمان (ڈیلی اردو/بی بی سی) اردن کی وزارت خارجہ نے بتایا ہے کہ مقبوضہ غربِ اردن میں مبینہ طور پر اسلحہ سمگل کرنے کوشش کرنے پر اردن کے ایک رکنِ پارلیمان کو اسرائیل نے گرفتار کر لیا ہے۔

Footage shows the arms allegedly seized from a Jordanian parliament member at the Allenby Crossing pic.twitter.com/VZPY6IHhlM

— Emanuel (Mannie) Fabian (@manniefabian) April 23, 2023

اردن کی ایمن نیوز ایجنسی کے مطابق عیماد الادوان نامی رکنِ پارلیمان کو سنیچر کی رات کو ایلنبی بریج کراسنگ پر حراست میں لیا گیا تھا۔

اسرائیلی سوشل میڈیا پر گردش کرنے والی غیر تصدیق شدہ ویڈیو کے مطابق اسرائیلی حکام کا دعوی ہے کہ انھیں 12 مشین گنیں اور 270 کی تعداد میں مختلف اقسام کا آتشیں اسحلہ ملا ہے۔

اسرائیل نے اس معاملے پر کوئی تبصرہ نہیں کیا ہے اور سوشل میڈیا رپورٹنگ پر سختی کر دی ہے۔

اردن کی وزارتِ خارجہ کے حکام نے کہا ہے کہ وہ اس معاملے کو ’جلد از جلد‘ حل کرنے کی کوشش کر رہے ہیں۔

قال الناطق الرسمي باسم #وزارة_الخارجية_وشؤون_المغتربين السفير سنان المجالي إن الوزارة وبالتنسيق مع جميع الجهات المعنية تتابع قضية النائب عماد العدوان الذي أوقفته السلطات الإسرائيلية للتحقيق معه على خلفية عملية تهريب مزعومة لكميات من السلاح والذهب. pic.twitter.com/0RqQIjPI3T

— وزارة الخارجية وشؤون المغتربين الأردنية (@ForeignMinistry) April 23, 2023

اسرائیلی میڈیا کے مطابق شِن بیت سکیورٹی ایجنسی یہ معلوم کرنے کی کوشش کر رہی ہے کہ یہ اسلحہ کس کو بھیجا جا رہا تھا اور آیا اس رکنِ پارلیمان نے اس سے پہلے بھی یہ کام کیا ہے۔

اردن اور اسرائیل نے سنہ 1994 میں امن معاہدے پر دستخط کرنے کے بعد سفارتی تعلقات قائم کر لیے تھے۔ تاہم مقبوضہ بیت المقدِس میں مسجدِ اقصی میں اسرائیلی سکیورٹی فورسز اور فلسطینیوں کے درمیان جھڑپوں کی وجہ سے دونوں ممالک کے درمیان تعلقات میں کشیدگی پیدا ہوئی ہے۔ اردن مسجدِ اقصیٰ کا نگران بھی ہے۔

مسجدِ اقصیٰ بیت المقدِس (مشرقی یروشلم) میں واقع ہے جس پر اسرائیل کا قبضہ ہے۔ یہ یروشلم کی سب سے بڑی مسجد ہے جس میں ہزاروں نمازیوں کی گنجائش ہے۔

اردن کی آبادی کا نصف سے زیادہ حصہ فلسطینی نژاد ہے۔ اردن کے اکثر لوگ مقبوضہ غربِ اردن میں فلسطینیوں کی جدوجہد کی حمایت کرتے ہیں۔ جب بھی اسرائیل اور فلسطینیوں کے درمیان کشیدگی میں اضافہ ہوتا ہے تو اردن میں احتجاجی مظاہرے شروع ہو جاتے ہیں۔

اسرائیل کی جانب سے گرفتار کیے جانے والے 35 سالہ عیماد الادوان اردن کی پارلیمان کی فلسطین کمیٹی کے رکن ہیں۔ اردن کے ایک نمایاں رکنِ پارلیمان خلیل عطیہ، جو اردن کے اسرائیل کے ساتھ امن معاہدے کے خلاف ہیں، کا کہنا ہے کہ اسرائیل کی جانب سے عیماد الادوان کی گرفتاری نے اردنی لوگوں کے ’وقار کو مجروع ‘ کیا ہے۔

یروشلم میں پہاڑی کی چوٹی پر واقع الاقصیٰ کمپلیکس یہودیوں کا سب سے مقدس اور اسلام کا تیسرا مقدس ترین مقام ہے۔ یہودی اسے ٹمپل ماؤنٹ جبکہ مسلمان حرم الشریف کے نام سے پکارتے ہیں۔