اسرائیل نے مزید 30 فلسطینیوں کی لاشیں غزہ واپس بھیج دیں، حماس

غزہ (ڈیلی اردو/اے ایف پی/ڈی پی اے) حماس کے زیرِ انتظام وزارتِ صحت کا کہنا ہے کہ اسرائیل نے 30 مزید فلسطینیوں کی لاشیں غزہ میں انتظامیہ کے حوالے کر دی ہیں۔

حماس کے زیرِ انتظام وزارتِ صحت کی جانب سے سوشل میڈیا پر سامنے آنے والے ایک بیان میں اس بات کا اعلان کیا گیا ہے کہ ’بین الاقوامی امدادی ادارے ریڈ کراس نے 30 مزید فلسطینیوں کی لاشوں کی غزہ واپسی میں سہولت فراہم کی ہے۔

وزارت کے مطابق اب تک اسرائیل کی جانب سے واپس کی جانے والی لاشوں کی کل تعداد 120 ہو گئی ہے۔بیان میں مزید کہا گیا ہے کہ طبی عملہ لاشوں کا معائنہ کر رہا ہے تاکہ انھیں ان کے اہلِ خانہ کے حوالے کیا جا سکے۔

جنگ بندی کے معاہدے کی شرائط کے تحت، اسرائیل ہر ایک ہلاک شدہ اسرائیلی یرغمالی کے بدلے میں 15 فلسطینیوں کی لاشیں واپس کرنے پر متفق ہوا ہے۔