اسرائیل، ایران کی جوہری تنصیبات پر حملے کی تیاری کر رہا ہے، امریکی انٹیلیجنس

واشنگٹن (ڈیلی اردو رپورٹ) امریکی انٹیلیجنس حکام نے انکشاف کیا ہے کہ اسرائیل، ایران کی جوہری تنصیبات کو نشانہ بنانے کے لیے خفیہ طور پر تیاریوں میں مصروف ہے، تاہم اس حوالے سے حتمی فیصلے کا کوئی ثبوت تاحال موجود نہیں۔

امریکی نشریاتی ادارے ’سی این این‘ کی رپورٹ کے مطابق امریکی انٹیلی جنس ذرائع نے بتایا کہ انہیں ایسی خفیہ معلومات ملی ہیں جن سے ظاہر ہوتا ہے کہ اسرائیلی قیادت تہران کی جوہری سرگرمیوں کو روکنے کے لیے ممکنہ طور پر یکطرفہ کارروائی پر غور کر رہی ہے۔ اسرائیلی ذرائع کا کہنا ہے کہ اسرائیل کسی بھی ’ناقص معاہدے‘ کو قبول کرنے کے لیے تیار نہیں اور ایران کے خلاف اپنی تیاریوں کو حتمی شکل دے رہا ہے۔

یہ انکشاف ایسے وقت پر سامنے آیا ہے جب امریکا اور ایران کے درمیان یورینیم کی افزودگی کے معاملے پر مذاکرات تعطل کا شکار ہیں، اور امریکی صدر ڈونلڈ ٹرمپ کی انتظامیہ اب بھی ایران کے ساتھ کسی ممکنہ معاہدے پر کام کر رہی ہے۔

امریکی حکام کا کہنا ہے کہ اگر اسرائیل ایران پر حملہ کرتا ہے تو یہ امریکی حکمت عملی سے واضح انحراف ہو گا اور مشرق وسطیٰ میں بڑے پیمانے پر تصادم کی راہ ہموار ہو سکتی ہے۔ بعض امریکی حکام کا یہ بھی ماننا ہے کہ اسرائیل کا یہ قدم امریکا کو غیر متوقع سفارتی اور عسکری بحران میں دھکیل سکتا ہے۔

ادھر تہران کے تین علیحدہ ذرائع نے ’سی این این‘ کو بتایا کہ اگر موجودہ سفارتی کوششیں ناکام ہوئیں، تو ایران کے پاس کوئی واضح متبادل حکمت عملی موجود نہیں۔ ذرائع کا کہنا ہے کہ ایران، چین اور روس کے ساتھ تعلقات کو مضبوط بنانے کی کوشش کر سکتا ہے، لیکن موجودہ حالات میں یہ حکمت عملی کمزور دکھائی دیتی ہے کیونکہ چین اور امریکا تجارتی کشیدگی کا شکار ہیں اور روس یوکرین جنگ میں الجھا ہوا ہے۔

ایک اعلیٰ ایرانی عہدیدار نے بتایا کہ ایران کسی بھی ممکنہ حملے کی صورت میں دفاعی ردعمل کے لیے تیار ہے، تاہم فی الحال کشیدگی کو ہوا دینے سے گریز کیا جائے گا۔

ایرانی سپریم لیڈر آیت اللہ علی خامنہ ای نے بھی امریکی مطالبات کو ’توہین آمیز‘ قرار دیتے ہوئے کہا ہے کہ تہران اپنی یورینیم افزودگی کی پالیسی پر قائم رہے گا۔

یہ ممکنہ پیش رفت خطے میں ایک نئے اور خطرناک مرحلے کا آغاز ثابت ہو سکتی ہے، خاص طور پر ایسے وقت میں جب ایران اور مغرب کے درمیان اعتماد کا فقدان پہلے ہی گہرا ہو چکا ہے۔