افغانستان: طالبان انٹیلی جنس چیف کے معاون بم دھماکے میں ہلاک، بیٹا زخمی

کابل (ڈیلی اردو) افغانستان کے دارالحکومت کابل میں جمعے کے روز ایک دھماکہ ہوا، جس کے نتیجے میں افغان طالبان کی انٹیلی جنس ایجنسی کے سربراہ عبد الحق واثق کے معاون مولوی نعمان ہلاک ہو گئے۔

مقامی ذرائع اور افغان میڈیا کے مطابق یہ واقعہ کابل کے علاقے بوٹخاک میں مولوی نعمان کے گھر کے اندر پیش آیا۔ دھماکے کے نتیجے میں مولوی نعمان موقع پر ہی ہلاک ہو گئے جبکہ ان کا بیٹا زخمی ہوا اور اسے فوری طور پر قریبی اسپتال منتقل کر دیا گیا ہے۔

افغان میڈیا نے بتایا کہ طالبان حکام نے اب تک دھماکے کے حوالے سے کوئی باضابطہ بیان جاری نہیں کیا اور نہ ہی دھماکے کی اصل وجہ واضح کی گئی ہے۔ تاہم ابتدائی اطلاعات کے مطابق شبہ ظاہر کیا جا رہا ہے کہ دھماکہ گیس سلنڈر میں نصب بارودی مواد کے پھٹنے کی وجہ سے ہوا۔

یہ واقعہ افغان طالبان کے لیے ایک اور تشویشناک واقعہ ہے، کیونکہ مولوی نعمان ایجنسی کے اعلیٰ عہدے داروں میں شمار ہوتے تھے اور ان کا قریبی تعلق انٹیلی جنس چیف عبد الحق واثق سے تھا۔ دھماکے کے بعد علاقے میں حفاظتی اقدامات سخت کر دیے گئے اور مقامی حکام نے تحقیقات کا آغاز کر دیا ہے۔

افغان میڈیا کا کہنا ہے کہ اس دھماکے کے بعد طالبان کے اندرونی سکیورٹی امور اور دھماکوں کے خطرات پر سوالات اٹھنے لگے ہیں، اور یہ واقعہ طالبان کی سکیورٹی ایجنسی کے لیے بڑا دھچکہ ہے۔