افغانستان میں مبینہ پاکستانی ڈرون حملہ، ٹی ٹی پی کے اہم کمانڈر سمیت متعدد شدت پسند ہلاک

واشنگٹن (ش ح ط) فغانستان کے صوبہ پکتیکا کے ضلع گومل میں مبینہ طور پر پاکستانی ڈرون حملے میں کالعدم تحریک طالبان پاکستان (ٹی ٹی پی) کے ایک اہم مرکز کو نشانہ بنایا گیا، جس کے نتیجے میں اہم کمانڈر سمیت متعدد شدت پسند ہلاک ہو گئے۔

پاکستانی سیکورٹی ذرائع کے مطابق، ہلاک ہونے والوں میں ٹی ٹی پی کے ایک سینئر کمانڈر احمد حسین المعروف گھٹ حاجی بھی شامل ہیں، جو تنظیم ٹی ٹی پی کے سربراہ نور ولی محسود کے قریبی ساتھی سمجھے جاتے تھے۔

پاکستانی سیکیورٹی حکام کا کہنا ہے کہ اس حملے میں وہ شدت پسند بھی مارے گئے جو پاکستان میں ہونے والے متعدد دہشت گردانہ حملوں میں ملوث رہے ہیں۔

یہ حملہ ایسے وقت میں ہوا ہے جب پاکستان میں دہشت گردی کی کارروائیوں میں نمایاں اضافہ دیکھنے میں آ رہا ہے، جن میں سے زیادہ تر کی منصوبہ بندی اور کارروائیاں افغان سرزمین سے کی جا رہی ہیں۔ پاکستان نے کئی بار افغانستان میں موجود ٹی ٹی پی کے محفوظ ٹھکانوں پر تشویش کا اظہار کیا ہے اور کابل کی طالبان حکومت سے مطالبہ کیا ہے کہ وہ اپنی سرزمین کو پاکستان کے خلاف دہشت گردی کے لیے استعمال ہونے سے روکے۔

ادھر افغانستان سے ملنے والی اطلاعات کے مطابق، رمضان کی 28ویں شب کو افغانستان کے صوبہ پکتیکا کے علاقے گومل میں پاکستانی ڈرون نے ایک گھر کو نشانہ بنایا، جس کے نتیجے میں خواتین اور بچوں سمیت 7 افراد ہلاک ہو گئے۔

ذرائع کے مطابق، واقعہ دور افتادہ پہاڑی علاقے میں پیش آیا۔

مقامی ذرائع نے کچھ تصاویر اور ویڈیوز بھی فراہم کی ہیں، جن میں خواتین اور بچوں کو دیکھا جا سکتا ہے۔ اس حملے کے بعد علاقے میں کشیدگی بڑھنے کا خدشہ ظاہر کیا جا رہا ہے۔

دوسری جانب، افغان طالبان کی حکومت نے تاحال اس حملے پر کوئی باضابطہ ردعمل نہیں دیا۔ تاہم، ماضی میں کابل کی حکومت ایسے حملوں کو اپنی خودمختاری کی خلاف ورزی قرار دیتی رہی ہے۔

پاکستانی حکام کا کہنا ہے کہ وہ اپنی سرحدوں کے تحفظ کے لیے ہر ممکن اقدام کریں گے اور دہشت گردوں کے خلاف سخت کارروائی جاری رکھیں گے۔

پاکستان کے سابقہ حملے اور کارروائیاں

پاکستانی سیکیورٹی فورسز نے اس سے قبل بھی افغانستان میں ٹی ٹی پی کے خلاف کارروائیاں کی ہیں:

دسمبر 2024

پاکستانی لڑاکا طیاروں نے افغانستان کے صوبہ پکتیکا میں ٹی ٹی پی کے چار مبینہ کیمپوں پر بمباری کی، جس میں کئی مشتبہ دہشت گرد ہلاک اور زخمی ہوئے۔ یہ حملے ضلع برمل کے علاقوں مرغا اور لامان میں کیے گئے، جہاں ٹی ٹی پی کے اہم کمانڈرز کے مراکز موجود تھے۔

اپریل 2022

پاکستانی ڈرونز نے پہلی بار افغانستان میں کارروائی کرتے ہوئے صوبہ خوست اور کنڑ میں ٹی ٹی پی کے مراکز کو نشانہ بنایا۔ ان حملوں میں ٹی ٹی پی کو کافی نقصان پہنچا، اور تنظیم نے ان علاقوں کی ناکہ بندی کر کے نقصانات کو چھپانے کی کوشش کی۔

پاکستان کی جانب سے یہ حملے اس وقت کیے گئے جب افغان حکومت ٹی ٹی پی کے خلاف مؤثر کارروائی میں ناکام رہی۔ پاکستانی حکام کا مؤقف ہے کہ افغانستان میں موجود دہشت گرد گروہ پاکستان کی سلامتی کے لیے خطرہ ہیں، اور ان کے خلاف کارروائی ضروری ہے۔ تاہم اففان حکومت کی جانب سے فوری طور پر کوئی ردعمل سامنے نہیں آیا ہے لیکن ان حملوں کے بعد دونوں ممالک کے درمیان تعلقات مزید کشیدہ ہو سکتے ہیں، اور علاقائی سلامتی پر اس کے اثرات مرتب ہو سکتے ہیں۔

پاکستانی حکام کا کہنا ہے کہ وہ اپنی سرزمین کے دفاع اور دہشت گردی کے خاتمے کے لیے ہر ممکن اقدام کریں گے۔

پاکستان میں دہشت گردی کی حالیہ صورتحال

پاکستان میں حالیہ مہینوں میں دہشت گردی کے واقعات میں اضافہ دیکھا گیا ہے۔ خاص طور پر خیبر پختونخوا اور بلوچستان میں سیکیورٹی فورسز پر حملے بڑھ گئے ہیں۔ پاکستانی حکام کا کہنا ہے کہ ان حملوں کے پیچھے افغانستان میں موجود ٹی ٹی پی کے محفوظ ٹھکانے ہیں، اور ان کے خلاف کارروائی ملکی سلامتی کے لیے ضروری ہے۔

پاکستانی سیکیورٹی فورسز نے دہشت گردوں کے خلاف کارروائیاں تیز کر دی ہیں، اور حالیہ ڈرون حملہ اسی سلسلے کی کڑی ہے۔ حکام کا کہنا ہے کہ وہ دہشت گردی کے خاتمے کے لیے ہر ممکن اقدام کریں گے اور اپنی سرزمین کو محفوظ بنانے کے لیے پرعزم ہیں۔