افغانستان: ننگرھار مسجد میں دھماکے، شہدا کی تعداد 72 ہوگئی، اقوام متحدہ کی شدید مذمت

کابل (نمائندہ ڈیلی اردو) افغان صوبے ننگرہار میں گزشتہ روز نماز جمعہ کی ادائیگی کے دوران 2 خودکش حملوں کے نتیجے میں شہدا نمازیوں کی تعداد 72 ہو گئی ہے اور 100 سے زائد زخمی ہیں۔

ہسپتال ذرائع کا کہنا ہے کہ متعدد زخمیوں کی حالت تشویش ناک بتائی گئی ہے۔

دھماکے میں شہید ہونے والے 50 سے زائد افراد کی اجتماعی نماز جنازہ مقامی قبرستان میں ادا کردی گئی۔ نماز جنازہ میں ہزاروں افراد نے شرکت کی۔ شہداء کی انکے آبائی علاقوں میں تدفین کردی گئی۔

#Nangarhar update: Residents of Haska Mina district of Nangarhar province claim number of dead is now 72 from #mosque explosion on Friday. pic.twitter.com/CNbYLFXh1k

— TOLOnews (@TOLOnews) October 19, 2019

دوسری جانب اقوام متحدہ کے سیکرٹری جنرل انتونیو گوٹریش نے افغانستان میں جمعے کی نماز کے دوران ایک مسجد میں ہونے والے حملے کی شدید مذمت کی ہے۔ مشرقی افغان صوبے ننگرہار کے ضلع ہسکہ مینا کی ایک مسجد میں ہونے والے بم دھماکے میں کم از کم 72 افراد کی شہادت کی تصدیق ہو چکی ہے۔

اقوام متحدہ کی ترجمان اسٹیفنہ دوجاریک نے کہا ہے کہ اس واقعے کے ذمہ دار افراد کو جوابدہ ٹھہرانا ہوگا۔ ترجمان کے مطابق اقوام متحدہ کے سیکرٹری جنرل نے گہرے دکھ کے ساتھ شہدا کے لواحقین سے افسوس کا اظہار کیا۔ یہ حملہ ایک مسجد پر اس وقت کیا گیا جب تقریباً 250 نمازی مسجد کے اندر موجود تھے۔ دھماکے کے بعد یہ مسجد شدید تباہی کا شکار ہوئی اور درجنوں افراد ملبے تلے دب کر شہید ہوئے۔