امریکا: ایران سے بیلسٹک میزائل یمن سمگلنگ پر پاکستانی شہری کو 40 سال قید

واشنگٹن (ش ح ط) امریکی ریاست ورجینیا کی عدالت نے پاکستانی شہری محمد پہلوان کو ایران سے بیلسٹک میزائل کے پرزے اور دیگر ہتھیار یمن پہنچانے کے الزام میں 40 سال قید کی سزا سنا دی ہے۔

محمد پہلوان پر الزام تھا کہ وہ ماہی گیروں کی کشتیوں کا استعمال کرتے ہوئے ایران نواز حوثی ملیشیا کو بیلسٹک میزائل کے پرزے اور دیگر ہتھیار فراہم کرتا رہا۔ پہلوان کو جنوری 2024 میں بحیرۂ احمر میں امریکی بحریہ کی کارروائی کے دوران گرفتار کیا گیا، اس اپریشن کے دوران دو امریکی نیوی سیلز، کرسٹوفر چیمبرز اور نیتھن گیج انگراہم، سمندر میں ڈوب کر ہلاک ہوگئے تھے۔

عدالت میں پیش کی گئی گواہیاں

امریکی محکمہ انصاف کے مطابق ورجینیا میں ایک وفاقی جیوری نے محمد پہلوان کو دہشت گردوں کو مادی مدد فراہم کرنے، ایران کے بڑے پیمانے پر تباہی پھیلانے والے ہتھیاروں کے پروگرام میں مدد کرنے، دھماکہ خیز مواد کی نقل و حمل کی سازش اور دیگر الزامات میں مجرم قرار دیا۔

عدالتی دستاویزات کے مطابق اگست 2023 سے جنوری 2024 کے دوران پہلوان نے ایرانی پاسداران انقلاب سے وابستہ دو ایرانی بھائیوں کے ساتھ مل کر ایران سے حوثی ملیشیا کو ہتھیار سمگل کرنے کا کام کیا۔ محمد پہلوان اس جہاز کا کپتان تھا۔

انچاس سالہ محمد پہلوان کو جمعرات کو 40 برس قید کی سزا سنائی گئی، تاہم اس سے قبل اُنھیں دہشت گردی اور تباہی پھیلانے والے ہتھیاروں کی سمگلنگ سمیت پانچ الزامات پر مجرم قرار دیا گیا تھا۔

سمگلنگ کا طریقہ کار

عدالتی دستاویزات کے مطابق جہاز پر ایرانی ساختہ بیلسٹک میزائل اور اینٹی شپ کروز میزائل کے پرزے دریافت ہوئے، جو حوثی ملیشیا کے تجارتی جہازوں اور امریکی فوجی جہازوں پر حملے کے لیے استعمال کیے جانے والے ہتھیاروں سے مطابقت رکھتے تھے۔

پہلوان نے ایران سے حوثیوں کو ہتھیار پہنچانے کے لیے ماہی گیروں کو استعمال کیا اور عملے کو دھوکہ دیتے ہوئے انہیں معلوم نہ ہونے والی معلومات پر عمل کرنے پر مجبور کیا۔ عملے کے آٹھ ارکان نے عدالت میں کہا کہ انہیں نہیں معلوم تھا کہ ’یونس‘ نامی کشتی میں رکھے جانے والے بڑے بڑے تھیلوں میں کیا ہے۔ اس کام کے لیے پہلوان کو 33,274 ڈالر ادا کیے گئے۔

امریکی محکمہ جنگ کے مطابق جون میں یہ سفر ’ایک بڑے آپریشن کا حصہ‘ تھا، جس کی مالی مدد ایرانی بھائی یونس اور شہاب میرکازئی نے کی۔ دونوں مبینہ طور پر ایران کے پاسدارانِ انقلاب سے وابستہ ہیں اور امریکی حکام کے مطابق وہ مفرور ہیں اور ایران میں موجود ہیں۔

امریکی آپریشن اور اہلکاروں کی ہلاکت

11 جنوری 2024 کو امریکی بحریہ نے کشتی پر کارروائی کی۔ دوران آپریشن، مسلح امریکی سیلز اور کوسٹ گارڈ اہلکاروں نے جہاز کو روکنے کی کوشش کی، جس میں دو اہلکار ڈوب گئے اور 10 روز بعد مردہ قرار دیے گئے۔ عملے کے رُکن مہندی حسن نے بتایا کہ دوران آپریشن انہیں کشتی پر دو دن تک رکھا گیا اور انہیں دو گروپس میں تقسیم کر کے کنٹینرز میں رکھا گیا۔

پہلوان نے عملے کو جھوٹ بولنے اور یہ کہنے کا حکم دیا کہ کپتان پہلے ہی بھاگ چکا ہے۔ عملے کے ایک رکن اسلم حیدر نے بتایا کہ پہلوان نے دھمکی دی کہ اگر وہ ایسا نہ کریں تو ان کے اور ان کے خاندان کے ساتھ نقصان ہوگا۔ امریکی اہلکاروں نے بعد میں جہاز میں موجود ہر رکن سے الگ الگ تفتیش کی۔

پاکستان 

ترجمان پاکستانی دفتر خارجہ نے یکم مارچ 2024 کو بتایا کہ امریکہ میں یمن اسلحہ سمگلنگ کیس میں گرفتار باشندوں کے حوالے سے حکومت امریکہ کے ساتھ رابطے میں ہے۔ اس واقعے میں گرفتار دیگر افراد میں پاکستانی نامزد افراد اظہار محمد، محمد مظہر، اور غفران اللہ شامل تھے۔ عدالتی دستاویزات کے مطابق دیگر تین ملزمان پر الزام ہے کہ انہوں نے جہاز کے کپتان کی شناخت اور ایران سے جہاز کی روانگی کے بارے میں جھوٹ بولا اور پاکستان سے سفر کا آغاز کرنے کا دعویٰ کیا۔

بعد میں انہیں اور ان کے خاندانوں کو جان سے مارنے کی دھمکیاں دیں۔

پہلوان اس سے قبل اکتوبر اور دسمبر 2023 میں اس نوعیت کے کامیاب سفر کر چکے تھے۔ انھوں نے اس کام میں مدد کے لیے 12 لوگوں کو بھرتی کیا جن سب کا تعلق پاکستان سے تھا اور یہ لوگ روزگار کی تلاش میں سرحد پار ایران گئے تھے۔

عدالت میں بتایا گیا کہ دسمبر 2024 میں سفر پر روانہ ہونے سے قبل ایران کے جنوبی ساحل چابہار میں ان افراد کو کشتی پر بڑے پیکٹ لوڈ کرنے کا کام سونپا گیا۔

پھر پانچ یا چھ دن سمندر میں رہنے کے بعد، جب وہ صومالیہ کے ساحل کے قریب تھے، تو ایک اور کشتی ان کے قریب آئی جس میں پانچ سے چھ افراد موجود تھے اور پھر یہ سارا سامان اُس کشتی میں منتقل کیا گیا۔

بین الاقوامی تناظر

حوثی ملیشیا نے، جو یمن کے بڑے حصے پر قابض ہے، اسرائیل اور حماس جنگ کے آغاز کے چند ہفتوں بعد نومبر 2023 میں بحیرہ احمر اور خلیج عدن میں بحری جہازوں پر حملے شروع کیے۔ وہ ان جہازوں کو نشانہ بناتے تھے جن کے بارے میں دعویٰ کرتے تھے کہ ان کا تعلق اسرائیل سے ہے اور یہ غزہ میں فلسطینیوں کی حمایت میں کیا گیا۔

امریکہ، برطانیہ، اسرائیل اور سعودی عرب کا الزام ہے کہ ایران حوثیوں کو سمندری راستے سے ہتھیار فراہم کر رہا ہے، جبکہ ایران نے ان الزامات کی سختی سے تردید کی ہے۔ اقوام متحدہ کی رپورٹ کے مطابق 2015 سے 2023 کے درمیان امریکی افواج اور اتحادیوں نے چھوٹی کشتیوں سے گولہ بارود، 365 اینٹی ٹینک گائیڈڈ میزائل اور 29,000 سے زیادہ ہتھیار قبضے میں لیے۔

عدالتی فیصلہ

محمد پہلوان کو دہشت گردوں کی مالی مدد اور وسائل فراہم کرنے کی سازش سمیت پانچ الزامات میں مجرم قرار دیا گیا اور 40 سال قید کی سزا سنائی گئی۔

 عدالت نے جرم کی سنگینی کے پیش نظر فیصلہ مناسب قرار دیا، اگرچہ وکیل نے رحم کی اپیل میں کہا کہ اس کی گرفتاری کے بعد ان کی بیوی اور بچوں کی زندگی شدید مشکلات کا شکار ہو گئی ہے۔

سزا کا اعلان امریکی ضلعی جج ڈیوڈ جے نوواک نے کیا، جب کہ مقدمے کی پیروی امریکی محکمۂ انصاف کے نیشنل سکیورٹی ڈویژن اور ایف بی آئی کے انسدادِ دہشت گردی کے حکام نے کی۔