امریکا: جارجیا میں فوجی اڈے پر فائرنگ، 5 فوجی زخمی، حملہ آور گرفتار

واشنگٹن (نمائندہ  ڈیلی اردو/خبر ایجنسیاں) امریکی ریاست جارجیا میں فورٹ سٹیورٹ کے فوجی اڈے پر فائرنگ کے ایک واقعے میں کم از کم پانچ فوجی اہلکار زخمی ہو گئے، جبکہ حملہ آور کو سکیورٹی فورسز نے حراست میں لے لیا ہے۔

فوجی حکام کے مطابق یہ واقعہ بدھ کی صبح سیکنڈ آرمڈ بریگیڈ کامبیٹ ٹیم کے علاقے میں پیش آیا، جس کے بعد اڈے کو فوری طور پر لاک ڈاؤن کر دیا گیا۔ حکام کا کہنا ہے کہ لاک ڈاؤن صبح 11 بج کر 4 منٹ پر نافذ کیا گیا، جبکہ حملہ آور کو 11 بج کر 35 منٹ پر گرفتار کر لیا گیا۔

فورٹ سٹیورٹ ہنٹر آرمی ایئر فیلڈ کی جانب سے جاری بیان میں کہا گیا ہے کہ زخمی فوجی اہلکاروں کو فوری طور پر ابتدائی طبی امداد دی گئی اور بعد ازاں ہسپتال منتقل کیا گیا۔ اڈے کے حکام کے مطابق اب اڈے یا قریبی علاقوں کو کسی بھی قسم کے فعال خطرے کا سامنا نہیں ہے۔

وائٹ ہاؤس کی ترجمان کیرولین لیویٹ نے بتایا کہ صدر ڈونلڈ ٹرمپ کو واقعے سے متعلق بریفنگ دی گئی ہے، جبکہ وفاقی حکام مسلسل صورتحال کا جائزہ لے رہے ہیں۔

تاحال حملہ آور کی شناخت اور فائرنگ کے محرکات کے بارے میں کوئی تفصیلات جاری نہیں کی گئیں۔ فوجی حکام نے واقعے کی مکمل تفتیش شروع کر دی ہے۔