امریکا: خودکش حملے کی دھمکی دینے والے افغان شہری محمد داؤد الوک زئی گرفتار

واشنگٹن (ش ح ط ) امریکہ کی ریاست ٹیکساس میں خودکش حملے کی دھمکی دینے والے افغان شہری محمد داؤد الوک زئی کو ڈپارٹمنٹ آف ہوم لینڈ سکیورٹی نے گرفتار کر لیا ہے۔

ڈیلی اردو کے مطابق گرفتاری منگل کو عمل میں آئی اور مقامی عدالت میں اس کے خلاف دہشت گردی کا مقدمہ چلایا جا رہا ہے۔ حکام کے مطابق محمد داؤد الوک زئی "آپریشن الائیز ویلکم" کے تحت امریکہ آیا تھا اور اسے 7 ستمبر 2022 کو مستقل رہائش (گرین کارڈ) بھی دیا گیا تھا۔

گرفتار شخص نے ایک ٹک ٹاک ویڈیو پوسٹ کی تھی جس میں اس نے دعویٰ کیا کہ وہ خودکش جیکٹ بنا رہا ہے اور فورٹ ورتھ شہر کو نشانہ بنائے گا۔

یاد رہے کہ گزشتہ دنوں امریکی تفتیش کاروں نے وائٹ ہاؤس کے قریب نیشنل گارڈز کے اہلکاروں پر فائرنگ کرنے والے افغان شہری رحمان اللہ لکنوال کو بھی گرفتار کیا تھا، جو 2021 میں امریکہ آیا تھا۔

اس حملے میں نیشنل گارڈ کی 20 سالہ رکن سارہ بیکسٹرم زخمی ہوئی تھیں اور جمعرات کو زخموں کی تاب نہ لاتے ہوئے ہلاک ہو گئیں، جبکہ ان کے ساتھی 24 سالہ اینڈریو وولف کی حالت نازک ہے۔

ڈپارٹمنٹ آف ہوم لینڈ سکیورٹی کا کہنا ہے کہ امریکہ اپنی سرزمین پر ایسے عناصر کو پناہ نہیں دے گا جو شہریوں کے لیے خطرہ بن سکتے ہیں، اور تمام حفاظتی اقدامات جاری ہیں۔

امریکی قانون نافذ کرنے والے ادارے معاملے کی مزید تفتیش کر رہے ہیں۔

نیو یارک پوسٹ نے امریکی ہوم لینڈ سیکیورٹی کے اعداد و شمار کے حوالے سے رپورٹ کیا ہے کہ 2021 سے اب تک 6,868 افغان پناہ گزینوں کو امریکہ میں داخلے کے بعد ممکنہ "سکیورٹی خطرے" کی نشاندہی کی بنیاد پر فہرست میں شامل کیا گیا ہے۔

ان میں سے 5 ہزار سے زائد افراد قومی سلامتی کے اعتبار سے مشکوک قرار دیے گئے ہیں، 956 افراد عوامی تحفظ سے متعلق مسائل کے باعث زیرِ نگرانی ہیں، جبکہ تقریباً 900 افراد ممکنہ "دھوکہ دہی" کے شبہے میں تحقیقات کے مرحلے میں ہیں۔