امریکا: چینی شہری کو شمالی کوریا کیلئے ہتھیار اسمگلنگ پر 8 سال قید

واشنگٹن (ڈیلی اردو) امریکی محکمہ انصاف کے مطابق ایک چینی شہری کو شمالی کوریا کے لیے آتشیں اسلحہ اور فوجی سازوسامان اسمگل کرنے کے جرم میں آٹھ سال قید کی سزا سنائی گئی ہے۔

بیان کے مطابق، 42 سالہ شینگوا وین، جو کیلیفورنیا کے شہر اونٹاریو کا رہائشی ہے، نے اعتراف کیا کہ وہ شمالی کوریا کے لیے غیر قانونی ایجنٹ کے طور پر کام کرتا رہا اور بین الاقوامی ایمرجنسی اکنامک پاورز ایکٹ کی خلاف ورزی میں ملوث رہا۔

محکمہ انصاف کا کہنا ہے کہ وین کو شمالی کوریا کے حکام کی جانب سے ہتھیار خریدنے کے لیے تقریباً 20 لاکھ ڈالر موصول ہوئے تھے۔ اس نے 2023 میں لانگ بیچ کی بندرگاہ سے آتشیں اسلحے کے کم از کم تین کنٹینرز چین بھیجے، جن کی حتمی منزل شمالی کوریا تھی۔ ایک کنٹینر کو ریفریجریٹر کے نام پر بھیجا گیا جو جنوری 2024 میں ہانگ کانگ پہنچا تھا۔

سرکاری ریکارڈ کے مطابق، وین نے 2022 میں شمالی کوریائی اہلکاروں کی ہدایت پر امریکہ سے ہتھیار اسمگل کرنے کا منصوبہ بنایا اور ٹیکساس سے خریدے گئے اسلحہ کو کیلیفورنیا پہنچا کر بھیجنے کا انتظام کیا۔ گزشتہ برس ستمبر میں اس نے 9 ایم ایم کے تقریباً 60 ہزار راؤنڈ بھی خریدے تھے جنہیں وہ شمالی کوریا بھیجنے کا ارادہ رکھتا تھا۔

امریکی حکام کا کہنا ہے کہ یہ کیس اس بات کی عکاسی کرتا ہے کہ کس طرح شمالی کوریا بین الاقوامی پابندیوں کے باوجود خفیہ طریقوں سے ہتھیار حاصل کرنے کی کوشش کرتا ہے۔