امریکہ: دہشت گردوں کی حمایت اور جرائم کے باعث 6 ہزار طلبا کے ویزے منسوخ

واشنگٹن + نیویارک (ڈیلی اردو) امریکہ نے چھ ہزار سے زائد بین الاقوامی طلبا کے ویزے منسوخ کر دیے ہیں۔ امریکی محکمہ خارجہ کے مطابق یہ اقدام طلبہ کے امریکی قوانین کی خلاف ورزی اور مقررہ مدت سے زائد قیام کے باعث کیا گیا ہے۔

یہ اعلان ایک ایسے وقت میں سامنے آیا ہے جب ٹرمپ انتظامیہ امیگریشن اور غیر ملکی طالب علموں کے خلاف سخت کریک ڈاؤن جاری رکھے ہوئے ہے۔

محکمہ خارجہ کے مطابق تقریباً چار ہزار طلبا کے ویزے غیر قانونی طویل قیام یا خلاف ورزیوں، جیسے کہ چوری، نشے کی حالت میں ڈرائیونگ اور قاتلانہ حملے جیسے جرائم کے باعث منسوخ کیے گئے۔ جبکہ تقریباً 200 سے 300 طلبا کے ویزے ان پر دہشت گرد تنظیموں کی حمایت یا وابستگی کے شبہ میں منسوخ کیے گئے ہیں۔

اگرچہ محکمہ خارجہ نے یہ واضح نہیں کیا کہ ’’دہشت گردی کی حمایت‘‘ سے کیا مراد ہے، لیکن اطلاعات کے مطابق ٹرمپ انتظامیہ نے فلسطین کی حمایت میں احتجاج کرنے والے کچھ طلبہ کو بھی نشانہ بنایا ہے، یہ دلیل دیتے ہوئے کہ ان کے رویے میں ’’یہود مخالف عناصر‘‘ پائے گئے۔

یہ اقدام ٹرمپ انتظامیہ کی سخت امیگریشن اور قومی سلامتی پالیسیوں کا حصہ ہے، جس میں ویزا درخواست دہندگان کی سوشل میڈیا پر نگرانی اور سخت سکریننگ شامل ہے۔

امریکی وزیر خارجہ مارکو روبیو نے مئی میں کابینہ اجلاس کو بتایا تھا کہ جنوری سے اب تک ’’ہزاروں‘‘ طلبہ کے ویزے منسوخ کیے جا چکے ہیں۔ ان کا کہنا تھا کہ ’’مجھے تازہ ترین اعداد و شمار کا علم تو نہیں، لیکن شاید ہمیں مزید کام کرنا پڑے گا۔ ہم ان لوگوں کے ویزے منسوخ کرنا جاری رکھیں گے جو مہمان کے طور پر یہاں موجود ہیں مگر ہماری اعلیٰ تعلیم کی سہولیات میں خلل ڈال رہے ہیں۔‘‘