امریکی صدر ٹرمپ نے وزیراعظم عمران خان کو ایران سے بات چیت کا مینڈیٹ دیدیا ہے: وزیر خارجہ

نیویارک (ڈیلی اردو/نیوز ایجنسی) وزیر خارجہ شاہ محمود قریشی نے کہا ہے کہ ڈونلڈ ٹرمپ نے وزیر اعظم عمران خان کو ایران کے ساتھ بات چیت کا مینڈیٹ دے دیا ہے۔

نیویارک میں میڈیا سے گفتگو کرتے ہوئے شاہ محمود قریشی نے کہا کہ امریکی صدر کے ساتھ وزیراعظم عمران خان کی ملاقات ہوئی ہے۔ وزیراعظم نے تین ایشوز پر دوٹوک بات کی ہے۔ وزیراعظم نے کشمیر کی صورتحال پر کھل کرموقف پیش کیا اور کہا کہ 80 لاکھ کشمیریوں کو گھروں میں محصور کردیا گیا۔

انہوں نے کہا کہ وزیراعظم نے واضح بات کی کوئی ابہام نہیں رکھا۔ وزیراعظم نے کشمیر کے مسئلے پر ڈونلڈ ٹرمپ سے اپنا کردار ادا کرنے کا کہا ہے۔ وزیراعظم نے واضح طور پر کہا کہ افغان ایشوز پر پاکستان کا کردار مخفی نہیں۔ ڈونلڈ ٹرمپ نے افغان امن عمل میں پاکستان کے کردار کوسراہا جبکہ وزیراعظم نے کہا کہ افغان امن مذاکرات میں تعطل جلد ختم ہونا چاہیے۔

شاہ محمود قریشی نے کہا کہ وزیر اعظم نے امریکی صدر سے ملاقات میں واضح کہا ہے کہ افغان مسئلے کا کوئی فوجی حل نہیں ہے اور آج بھی آپ مذاکرات کے ذریعے آگے بڑھ سکتے ہیں۔ افغان مذاکرات میں تعطل جلد ازجلد ختم ہوناچاہیے۔

وزیر خارجہ نے کہا کہ ایران کے مسئلے پر وزیراعظم کا موقف بڑا واضح تھا کہ یہ خطہ اب کسی اور جنگ کا متحمل نہیں ہوسکتا۔ اگر کوئی کارروائی کی جاتی ہے تو اس کے بہت بھیانک نتائج بر آمد ہوں گے۔

انہوں نے کہا کہ وزیراعظم نے اس حوالے سے واضح کیا کہ ہم ایران کے مسئلے پر کردار ادا کرنے کیلئے تیار ہیں، جس پر ڈونلڈ ٹرمپ نے کہا کہ آپ معاملات آگے بڑھا سکتے ہیں تو بڑھائیں۔

شاہ محمود قریشی نے کہا کہ ڈونلڈ ٹرمپ نے وزیر اعظم عمران خان کو ایران سے گفتگو کا مینڈیٹ دیا ہے۔ اب وزیر اعظم عمران خان سے ایرانی صدر کی ملاقات ہوگی جس میں ہم دیکھیں گے کہ ایران کے ساتھ معاملات کیسے سلجھ سکتے ہیں؟

انہوں نے کہا کہ سعودی ولی عہد سے بھی وزیر اعظم کی جو ملاقات ہوئی، اس میں بھی ہمارا موقف تھا کہ ہم کو جذبات کی بجائے معاملات کو سوچ سمجھ کر سلجھانا چاہے۔

شاہ محمود قریشی نے مزید کہا کہ وزیر اعظم نے ڈونلڈ ٹرمپ سے ملاقات میں پاکستان اور پاکستان کے لوگوں کی جو ایمانداری سے ترجمانی کرسکتے تھے وہ کی ہے۔