انٹرنیشنل اٹامک انرجی ایجنسی کا کوئی اہلکار پاکستان میں موجود نہیں، دورے کی خبر جھوٹی ہے، دفترِ خارجہ

اسلام آباد (ڈیلی اردو/بی بی سی) پاکستان کے دفترِ جارجہ نے انٹرنیشنل اٹامک انرجی ایجنسی (آئی اے ای اے) کے وفد کی پاکستان کے دورے کے حوالے سے چلنے والے خبروں کو ’فیک نیوز‘ قرار دیا ہے۔

جمعہ کو سوشل میڈیا پلیٹ فارم ’ایکس‘ پر ایک پوسٹ میں دفترِ جارجہ کی ترجمان ممتاز زہرہ بلوچ کا کہنا تھا کہ ’آئی اے ای اے‘ کے اعلیٰ سطحی وفد کے پاکستان کے دورے کے حوالے سے خبریں جھوٹی ہیں۔‘

Stories regarding the visit of a high-level IAEA delegation to Pakistan are fake news! No IAEA official is currently visiting Pakistan; Nor are any policy talks planned in near future with IAEA. DG IAEA visited Pakistan in Feb 2023. We had briefed the media on the occasion.

— Mumtaz Baloch (@Mumtazzb) March 15, 2024

دفترِ خارجہ کی جانب سے یہ وضاحت ایک ایسے وقت سامنے آئی ہیں جب مبینہ طور پاکستان تحریکِ انصاف (پی ٹی آئِی) کے حامی سوشل میڈیا اکاؤٹس کی جانب سے انڈین ٹی وی چینل کی ایک ویڈیو پوسٹ کی جا رہی ہے جس میں وزیراعظم شہباز شریف کو ’آئی اے ای اے‘ کے ڈائریکٹر جنرل رافیل ماریانو گروسی سے ملاقات کرتے ہوئے دیکھا جا سکتا ہے۔

اس ویڈیو کو سوشل میڈیا پر شیئر کرنے والے متعدد صارفین نے یہ سوال پوچھا کہ کیا موجود حکومت نے پاکستان کے جوہری ہتھیار ’آئی اے ای اے‘ کو سونپ دینے کے حوالے سے کوئی معاہدہ کر لیا ہے؟

اس حوالے سے وضاحت کرتے ہوئے دفترِ خارجہ کی ترجمان کا مزید کہنا تھا کہ ’نہ ہی اس وقت آئی اے ای اے کا کوئی اہلکار پاکستان میں موجود ہے اور نہ آئی اے ای اے کے ساتھ مستقبل قریب میں کوئی پالیسی لیول مذاکرات طے ہیں۔‘

انھوں نے مزید کہا کہ رافیل ماریانو گروسی نے فروری 2023 میں پاکستان کا دورہ کیا تھا اور اس حوالے سے اس وقت میڈیا کو بھی بریفنگ دی گئی تھی۔

انڈین ٹی وی چینل کی ویڈیو یوٹیوبر اور اینکرپرسن معید پیرزادہ نے بھی سوشل میڈیا پر شیئر کی تھی۔

وفاقی وزیرِ اطلاعات عطااللہ تارڑ نے ’ایکس‘ پر اینکرپرسن کو مخاطب کرتے ہوئے ایک پوسٹ میں لکھا کہ ’کوئی کسی مغالطے میں نہ رہے، ایسے جھوٹ اور ریاست کو نقصان پہنچانے کے لیے کیے جانے والے پراپگنڈے کا جواب دیا جائے گا۔‘