اورکزئی: پاکستانی طالبان نے فرنٹیئر کور کے 3 اہلکار اغوا کر لئے، سرچ آپریشن شروع

اورکزئی (ڈیلی اردو) پاکستان کے شورش زدہ صوبے خیبر پختونخوا کے قبائلی ضلع اورکزئی میں کالعدم تحریک طالبان پاکستان (ٹی ٹی پی) کے عسکریت پسندوں نے فرنٹیئر کور (ایف سی) کے تین اہلکاروں کو اغوا کر لیا ہے۔

پولیس اور مقامی ذرائع کے مطابق واقعہ ضلع اورکزئی کے بالائی علاقے غڑی ماموزئی، تھانہ غلجو کی حدود میں پیش آیا جہاں عسکریت پسندوں نے فرنٹیئر کور 216 ونگ کے تین اہلکاروں کو اغوا کرکے نامعلوم مقام پر منتقل کردیا۔

مغوی اہلکاروں کی شناخت نائیک انعام، سپاہی جہانگیر اور سپاہی سراج کے ناموں سے ہوئی ہے۔ واقعے کے بعد علاقے میں خوف و ہراس پھیل گیا جبکہ فورسز کی بھاری نفری کو مختلف مقامات پر تعینات کر دیا گیا ہے۔

سیکورٹی ذرائع کے مطابق اغوا ہونے والے اہلکاروں کی بازیابی کے لیے سرچ آپریشن شروع کر دیا گیا ہے اور ممکنہ ٹھکانوں کی نشاندہی پر چھاپے مارے جا رہے ہیں۔ تاہم آخری اطلاعات تک کسی بھی مغوی اہلکار کو بازیاب نہیں کرایا جا سکا۔

مقامی قبائلی عمائدین کا کہنا ہے کہ اغوا کی یہ کارروائی اس وقت سامنے آئی ہے جب حالیہ دنوں میں طالبان کی جانب سے قبائلی اضلاع میں سرگرمیوں میں اضافہ دیکھا جا رہا ہے۔ اس واقعے نے مقامی آبادی میں شدید تشویش اور عدم تحفظ کے احساس کو بڑھا دیا ہے۔

خیال رہے کہ اورکزئی، کرم اور جنوبی وزیرستان کے سرحدی علاقے ایک عرصے سے عسکریت پسندوں کی سرگرمیوں کی زد میں ہیں جہاں فورسز کو بارہا نشانہ بنایا جا چکا ہے۔