اگلی بار 60 بھارتی جنگی جہاز: ایئر وائس مارشل شہریار خان کا جوابی پیغام

کراچی (ڈیلی اردو ) پاکستانی فضائیہ کے ایئر وائس مارشل شہریار خان نے کہا ہے کہ آپریشن بنیان المرصوص چھ ستمبر کی یاد تازہ کرتا ہے، اور اگلی بار اسکور 0-6 نہیں بلکہ اللہ کی مدد سے 0-60 ہوگا۔

یہ بات انہوں نے سنیچر کی صبح کراچی میں مزار قائد پر گارڈز کی تبدیلی کی تقریب کے دوران خطاب کرتے ہوئے کہی۔ ایئر وائس مارشل نے کہا، “دفاع وطن کے لیے سیسہ پلائی دیوار کی طرح کھڑے رہیں گے، ہمارے دشمنوں کو ہمیشہ منہ کی کھانا پڑی، آئندہ بھی کسی بھی جارحیت کا منہ توڑ جواب دیں گے۔”

انہوں نے مزید کہا کہ چھ ستمبر وہ دن ہے جب مسلح افواج نے قوم کی حمایت سے دشمن کے عزائم کو خاک میں ملا دیا۔ ایئر وائس مارشل نے یہ بھی بتایا کہ قدرتی آفات اور ریسکیو آپریشن کے دوران بھی پاک فضائیہ ہر لمحہ پیش پیش رہی اور پاکستان کی فضائی حدود کا دفاع مضبوط ہاتھوں میں ہے۔

ٹرمپ کا بیان: پاک-بھارت جنگ بندی کی اہمیت

امریکی صدر ڈونلڈ ٹرمپ نے ایک بار پھر پاکستان اور بھارت کے درمیان تنازع کا ذکر کرتے ہوئے کہا کہ امن بہت ضروری ہے اور دونوں ممالک کے درمیان جنگ بندی کرائی گئی، یہاں تک کہ دونوں ایٹمی جنگ کے قریب پہنچ گئے تھے۔

ٹرمپ نے دعویٰ کیا کہ پاک-بھارت تنازع کے دوران چھ سے سات طیارے مار گرائے گئے تھے۔

واضح رہے کہ 22 اپریل کو انڈیا کے زیر انتظام کشمیر کے سیاحتی مقام پہلگام پر شدت پسند حملے کے بعد انڈیا نے کہا تھا کہ 6-7 مئی کی درمیانی شب کو اس نے پاکستان میں شدت پسندوں کے کیمپوں کو نشانہ بنایا، جسے ’آپریشن سندور‘ کا نام دیا گیا۔ اس آپریشن کے بعد دونوں ممالک کے درمیان فوجی کشیدگی پیدا ہوئی تھی۔