ایران: امریکہ اگر اسرائیل کی حمایت ترک کر دے تو تعاون ممکن ہے، خامنہ ای

تہران (ڈیلی اردو)  ایران کے رہبرِ اعلیٰ آیت اللہ علی خامنہ ای نے کہا ہے کہ اگر امریکہ اسرائیل کی حمایت چھوڑ دے اور مشرقِ وسطیٰ میں اپنی مداخلت ختم کر دے تو اس کے ساتھ تعاون ممکن ہے۔

تہران میں امریکی سفارت خانے پر قبضے کی برسی کے موقع پر خطاب کرتے ہوئے آیت اللہ خامنہ ای نے کہا کہ ایران اور امریکہ کے درمیان بنیادی عدم مطابقت موجود ہے اور دونوں ملکوں کے مفادات میں ٹکراؤ پایا جاتا ہے، تاہم اگر امریکہ کچھ شرائط پوری کرے تو تعاون پر غور کیا جا سکتا ہے۔

ان کا کہنا تھا کہ ’’اگر امریکہ اسرائیلی حکومت کی حمایت مکمل طور پر ترک کر دے، علاقے میں موجود اپنے فوجی اڈے خالی کر دے اور خطے میں اپنی مداخلت بند کر دے، تو اس کا جائزہ لیا جا سکتا ہے۔‘‘

ایرانی رہبرِ اعلیٰ نے مزید کہا کہ امریکہ کے ساتھ تعاون کے لیے کسی ممکنہ درخواست پر ابھی نہیں بلکہ مستقبل میں غور کیا جائے گا۔

ادھر امریکی صدر ڈونلڈ ٹرمپ نے سی بی ایس کو دیے گئے ایک انٹرویو میں دعویٰ کیا ہے کہ ایران امریکہ کے ساتھ معاہدہ کرنا چاہتا ہے۔ ان کے بقول، ’’یقیناً وہ ایسا نہیں کہیں گے، کیونکہ کوئی اچھا مذاکرات کار کبھی یہ تسلیم نہیں کرتا، لیکن ایران معاہدے کا خواہاں ہے۔‘‘

گزشتہ دنوں ایران اور امریکہ کے درمیان مذاکرات کی بحالی کے حوالے سے قیاس آرائیاں سامنے آئی ہیں۔ ایرانی حکومت کی ترجمان فاطمہ مہاجرانی نے کہا ہے کہ امریکہ کے ساتھ ممکنہ مذاکرات کے لیے عمان کے ذریعے پیغامات موصول ہوئے ہیں۔

عمانی وزیرِ خارجہ بدر البسیدی نے بھی حال ہی میں کہا تھا کہ ’’ہم چاہتے ہیں کہ ایران اور امریکہ کے درمیان مذاکرات دوبارہ شروع ہوں۔‘‘

تاہم ایرانی وزارتِ خارجہ کے ترجمان اسماعیل باغائی نے 3 نومبر کو وضاحت کی تھی کہ ’’حالیہ دنوں میں امریکہ کی جانب سے کوئی براہِ راست پیغام موصول نہیں ہوا‘‘ اور ’’ایران ایسے مذاکرات میں حصہ نہیں لے گا جن میں اسے اپنے حقوق سے دستبردار ہونا پڑے۔‘‘

اس سے قبل ایرانی وزیرِ خارجہ عباس عراقچی نے الجزیرہ کو انٹرویو دیتے ہوئے کہا تھا کہ ایران کو مذاکرات کی کوئی جلدی نہیں ہے، اور نائب وزیرِ خارجہ ماجد تخت روانچی کے مسقط کے حالیہ دورے کا امریکہ سے کوئی تعلق نہیں۔