ایران: عدالت نے نوبیل انعام یافتہ نرگس محمدی کو 6 سال قید کی سزا سنا دی

تہران (ڈیلی اردو) ایران کی ایک عدالت نے نوبیل انعام یافتہ 53 سالہ انسانی حقوق کی کارکن نرگس محمدی کو 6 سال قید کی سزا سنا دی ہے۔

خبر ایجنسی کے مطابق نرگس محمدی کے وکیل نے بتایا کہ عدالت نے انہیں جرائم کی منصوبہ بندی اور ملی بھگت کے الزام میں سزا سنائی ہے۔ 

وکیل کے مطابق نرگس محمدی پر دو سال کے لیے ملک چھوڑنے پر بھی پابندی عائد کی گئی ہے، جبکہ عدالتی فیصلے کے خلاف اپیل دائر کرنے کا حق موجود ہے۔

خبر ایجنسی کے مطابق نرگس محمدی گزشتہ کئی برسوں سے مختلف الزامات کے تحت ایران میں قید کی سزائیں بھگتتی رہی ہیں۔ وہ ایران میں سزائے موت اور خواتین کے لباس سے متعلق سخت قوانین کے خلاف آواز اٹھانے کے باعث عالمی سطح پر جانی جاتی ہیں۔