ایران: مسلح افراد کے حملے میں پاسدارانِ انقلاب کے 3 اہلکار ہلاک

تہران (ڈیلی اردو/ارنا) ایران کے سرکاری میڈیا کے مطابق، مسلح افراد نے پاکستان کی سرحد کے قریب ایران کے جنوب مشرقی صوبہ سیستان بلوچستان میں پاسداران انقلاب کے تین اہلکاروں کو ہلاک کر دیا۔

ایران کی سرکاری نیوز ایجنسی ارنا (IRNA) کی رپورٹ کے مطابق، پاسداران انقلاب کے اہلکاروں پر اس وقت گھات لگا کر حملہ کیا گیا جب وہ دارالحکومت تہران سے تقریباً 1100 کلومیٹر جنوب مشرق میں واقع ایک پہاڑی علاقے میں لار شہر کے قریب گشت کر رہے تھے۔

ارنا نے بتایا کہ ابھی تک کسی گروپ نے حملے کی ذمہ داری قبول نہیں کی ہے۔

ایرانی صوبہ سیستان بلوچستان، افغانستان اور پاکستان کی سرحد سے متصل ہے اور ایران کے کم ترقی یافتہ علاقوں میں سے ایک ہے۔ اس صوبے میں عسکریت پسند گروپوں، مسلح منشیات اسمگلروں اور ایرانی سکیورٹی فورسز کے درمیان ہلاکت خیز جھڑپوں وقتاﹰ فوقتاﹰ ہوتی رہتی ہیں۔

اگست میں، ایران کی سکیورٹی فورسز نے گشت پر مامور پانچ پولیس اہلکاروں کو ہلاک کرنے کے ایک ہفتے بعد، صوبے میں تین مختلف آپریشنز میں 13 عسکریت پسندوں کو ہلاک کر دیا تھا۔