ایران میں موساد سے مبینہ روابط پر ایرانی شہری کو پھانسی دے دی گئی

تہران (ڈیلی اردو) ایران نے اسرائیلی خفیہ ایجنسی موساد سے مبینہ تعاون اور حساس معلومات فراہم کرنے کے الزام میں ایک شخص کو بدھ کے روز پھانسی دے دی۔ قطری نشریاتی ادارے الجزیرہ اور ایرانی عدلیہ کی خبررساں ایجنسی ’میزان‘ کے مطابق، سزایافتہ شخص کی شناخت محسن لنگرنشین کے طور پر کی گئی ہے۔

ایرانی حکام کا کہنا ہے کہ محسن لنگرنشین نے 2020 سے 2022 تک موساد کو لاجسٹک، تکنیکی اور آپریشنل مدد فراہم کی۔ میزان کے مطابق، اس پر پاسداران انقلاب کے کرنل صیاد خدائی کے قتل میں سہولت کاری، اور اصفہان میں وزارت دفاع کی ایک تنصیب پر حملے میں ملوث ہونے جیسے سنگین الزامات عائد کیے گئے تھے۔

ایران کا دعویٰ ہے کہ محسن نے تفتیش کے دوران ان الزامات کا اعتراف کیا اور اس کے خلاف وسیع تکنیکی اور انٹیلیجنس شواہد موجود تھے۔ تاہم، انسانی حقوق کی تنظیمیں اس دعوے کو مسترد کرتی ہیں۔

ناروے میں قائم ایران ہیومن رائٹس کے سربراہ محمود امیری مقدم کا کہنا ہے کہ محسن کو غیر شفاف ٹرائل کے بعد سزائے موت سنائی گئی اور ان سے تشدد کے ذریعے اعتراف جرم لیا گیا۔ ان کے مطابق یہ ایک ماورائے عدالت قتل ہے، جس کی مذمت کی جانی چاہیے۔

امریکا میں قائم عبدالرحمن برومند سینٹر نے بھی عدالتی عمل پر تحفظات کا اظہار کرتے ہوئے کہا ہے کہ جولائی 2023 میں گرفتاری کے بعد محسن کو ابوالقاسم صلواتی کی عدالت میں پیش کیا گیا، جو انسانی حقوق کے اداروں کے مطابق سزائے موت سنانے کے لیے بدنام جج ہیں اور جن پر یورپی یونین اور امریکا کی پابندیاں بھی عائد ہیں۔

تنظیم کے مطابق، محسن لنگرنشین نے تمام الزامات سے انکار کیا تھا اور کہا تھا کہ ان سے جبراً اعتراف کرایا گیا۔