ایران پر ممکنہ حملے کے خدشات: بین الاقوامی ایئر لائنز کی پروازیں منسوخ

واشنگٹن (ش ح ط) دنیا کی کئی بڑی بین الاقوامی ایئر لائنز نے ایران کے خلاف ممکنہ امریکی فوجی کارروائی اور خطے میں بڑھتی ہوئی سیکیورٹی کشیدگی کے باعث مشرقِ وسطیٰ کے لیے اپنی پروازیں منسوخ یا معطل کر دی ہیں۔ 

یورپی ایئر لائنز لوفتھانزا، ایئر فرانس، کے ایل ایم اور سوئس نے ہفتے کے روز اسرائیل، متحدہ عرب امارات اور سعودی عرب جانے والی متعدد پروازیں منسوخ کرنے کا اعلان کیا، جبکہ یونائیٹڈ ایئرلائنز اور ایئر کینیڈا نے بھی اسرائیل کے لیے اپنی پروازیں روک دی ہیں۔ 

ایئرلائنز کا کہنا ہے کہ یہ فیصلے مسافروں اور عملے کی سلامتی کو مدنظر رکھتے ہوئے کیے گئے ہیں اور صورتحال کا مسلسل جائزہ لیا جا رہا ہے، تاہم حالات معمول پر آنے تک پروازوں سے متعلق پالیسی میں تبدیلی کا امکان برقرار ہے۔