ایران کے خلاف دوبارہ پابندیاں ’غیر قانونی‘ ہیں، روس

ماسکو (ڈیلی اردو) روس نے کہا ہے کہ تین یورپی ممالک کی طرف سے شروع کردہ تحریک کے نتیجے میںایران کے خلاف اقوام متحدہ کی پابندیوں کا دوبارہ نفاذ ’’غیر قانوی‘‘ ہے اور ان کی وجہ سے تہران کے جوہری پروگرام کے حوالے سے بحران محض شدید تر بنا دیا گیا ہے۔

ماسکو سے جمعرات دو اکتوبر کو ملنے والی رپورٹوں کے مطابق روسی وزارت خارجہ کی ترجمان ماریا ذخارووا نے کہا کہ ایران کے خلاف عالمی ادارے کی پابندیوں کا دوبارہ نفاذ برطانیہ، جرمنی اور فرانس پر مشتمل ’ای تھری‘ کہلانے والی ان تین ریاستوں کی طرف سے حالیہ صورت حال کو مبینہ طور پر ’’غلط استعمال کیے جانے‘‘ کا نتیجہ ہے۔

روسی وزارت خارجہ کی ترجمان نے ایک نیوز بریفنگ کے دوران کہا، ’’اس طرح جو کوششیں کی گئیں اور ان کا جو نتیجہ نکلا، وہ قانونی حوالے سے بے معنی اور غیر مؤثر ہے اور یوں دیگر ریاستوں کو پابندیوں کا شکار نہیں بنایا جا سکتا۔‘‘

تہران کے متنازعہ جوہری پروگرام کی وجہ سے اقوام متحدہ کی ایران کے خلاف پابندیاں 27 ستمبر کو اس طریقہ کار کے تحت دوبارہ نافذ العمل ہو گئی تھیں، جسے ’’اسنیپ بیک میکینزم‘‘ کہا جاتا ہے اور جس میں کلیدی کردار تین یورپی ممالک برطانیہ، فرانس اور جرمنی نے ادا کیا تھا۔