ایران کے سات شہروں میں دھماکے، نیول کمانڈر سمیت 10 ہلاک، 14 زخمی

تہران (ڈیلی اردو/روئٹرز/نیوز ایجنسیاں) ایران کے مختلف شہروں میں آج ہفتے کے دن کم از کم سات دھماکے ہوئے، جن میں 10 افراد ہلاک اور 14 زخمی ہوئے۔

جنوبی بندرگاہی شہر بندر عباس میں ایک زور دار دھماکے کے نتیجے میں پاسداران انقلاب کے ایک نیول کمانڈر سمیت تین افراد ہلاک اور 14 زخمی ہوئے۔ 

ایرانی حکام نے کہا ہے کہ دھماکے کی نوعیت اور وجہ کا تعین ابھی جاری ہے۔ 

نیم سرکاری خبر رساں ادارے تسنیم نے سوشل میڈیا پر گردش کرنے والی خبروں کی تردید کی کہ دھماکے میں پاسداران انقلاب کے کسی کمانڈر کو نشانہ بنایا گیا۔

اسی روز سرحدی شہر اہواز میں ایک پراسرار دھماکے کے نتیجے میں چار افراد ہلاک ہوئے۔ سرکاری اخبار تہران ٹائمز نے اس واقعے کی رپورٹ دی ہے، تاہم مزید تفصیلات سامنے نہیں آئیں۔

ایران بھر میں دھماکوں کی دیگر اطلاعات تہران، تبریز، پرند، قشم، نوشہر اور اردبیل سے بھی موصول ہوئی ہیں۔ یہ واقعات چند گھنٹوں کے دوران ملک کے شمال، جنوب، مشرق اور مغرب میں پیش آئے۔

خبر رساں ادارے روئٹرز کے مطابق دو اسرائیلی حکام نے کہا ہے کہ ان دھماکوں میں اسرائیل کا کوئی کردار نہیں۔ یہ واقعات ایسے وقت پیش آئے ہیں جب ایران اور امریکا کے درمیان کشیدگی میں اضافہ ہو رہا ہے۔ 

چند روز قبل امریکی صدر ڈونلڈ ٹرمپ نے کہا تھا کہ ایک بحری بیڑا ایران کی طرف بڑھ رہا ہے اور ذرائع کے مطابق امریکا ایران کی سکیورٹی فورسز کے خلاف ممکنہ محدود کارروائیوں پر غور کر رہا ہے۔