ایرانی سپریم لیڈر خامنہ ای کی نئی دہلی میں مسلمانوں کے قتل عام کی شدید مذمت

تہران (ڈیلی اردو) ایران کے سپریم لیڈر آیت اللّٰه خامنہ ای نے نئی دہلی میں ہونے والے فسادات کی شدید مذمت کی ہے، ایک بیان میں انہوں نے کہا ہے کہ بھارت میں مسلمانوں کے قتل عام پر دنیا بھر میں مسلمانوں کے دل دکھے ہوئے ہیں۔

انہوں نے کہا کہ بھارتی حکومت کو چاہیے کہ وہ انتہاپسند ہندوؤں اور ان کی جماعتوں کا سامنا کر کے ان کا مقابلہ کرے اور مسلمانوں کا قتل عام روکے تاکہ مسلم دنیا سے بھارت کے الگ تھلگ ہونے کا تاثر ختم کیا جا سکے۔

ایرانی وزیر خارجہ جواد ظریف نے بھی بھارتی مسلمانوں کے خلاف منظم تشدد کی لہر کی مذمت کی تھی، جس پر بھارت سیخ پا ہوا، اور ایرانی سفیر کو وزارت خارجہ میں طلب کرکے احتجاجی مراسلہ تھما دیا تھا۔

واضح رہے کہ انتہا پسندوں کے ہاتھوں قتل کے بعد جلائی جانے والی کئی لاشوں کی شناخت نہ ہوسکی۔ ان فسادات میں اب تک 53 سے زائد مسلمان اپنی جان سے ہاتھ دھو بیٹھے ہیں۔