ایف بی آئی نے نئے سال کے موقع پر امریکہ میں دہشت گردی کا منصوبہ ناکام بنا دیا

واشنگٹن (نمائندہ ڈیلی اردو ) امریکی حکام کا کہنا ہے کہ فیڈرل بیورو آف انویسٹی گیشن (ایف بی آئی) اور لاس اینجلس کے قانون نافذ کرنے والے اداروں نے نئے سال کے موقع پر دہشت گردی کی ایک مشتبہ سازش کو ناکام بنا دیا ہے۔

حکام کے مطابق پیر کے روز ایف بی آئی اور مقامی قانون نافذ کرنے والے اداروں نے جنوبی کیلیفورنیا میں کارروائی کرتے ہوئے ایک انتہا پسند گروہ کے چار مبینہ ارکان کو گرفتار کیا ہے۔ ان پر الزام ہے کہ وہ کم از کم پانچ مختلف مقامات پر مربوط بم حملوں کی منصوبہ بندی کر رہے تھے۔

امریکی حکام کا کہنا ہے کہ گرفتار افراد کا تعلق ’’ٹرٹل آئی لینڈ لبریشن فرنٹ‘‘ نامی تنظیم سے ہے، جسے ایک فلسطینی حکومت مخالف گروہ کی شاخ قرار دیا جا رہا ہے۔

تحقیقات کے مطابق مشتبہ افراد کو گزشتہ ہفتے اس وقت گرفتار کیا گیا جب وہ لاس اینجلس کے مشرق میں واقع صحرا میں دیسی ساختہ دھماکہ خیز آلات کا تجربہ کرنے جا رہے تھے۔

ایف بی آئی کا کہنا ہے کہ اگرچہ اس کارروائی کے ذریعے منصوبہ ناکام بنا دیا گیا ہے، تاہم سازش میں ممکنہ طور پر شامل دیگر افراد کی شناخت اور گرفتاری کے لیے تحقیقات جاری ہیں۔