ایف سی بلوچستان نے 141 دہشت گرد حملے ناکام بنائے، آئی جی ایف سی

کوئٹہ (ڈیلی اردو) انسپکٹر جنرل فرنٹیئر کور (ایف سی) بلوچستان (ساؤتھ) میجر جنرل بلال سرفراز خان نے انکشاف کیا ہے کہ جنوری 2025 سے اب تک ایف سی بلوچستان (ساؤتھ) نے 141 دہشت گرد کارروائیوں کو بروقت ناکام بنایا، جو ممکنہ طور پر بڑے سانحات کا سبب بن سکتی تھیں۔

وہ ضلع کیچ میں منعقدہ سیمینار ’’ترقی اور سیکیورٹی – ایک مشترکہ ذمہ داری‘‘ سے خطاب کر رہے تھے۔ ان کا کہنا تھا کہ ایف سی نہ صرف سیکیورٹی کی فراہمی میں مصروف عمل ہے بلکہ ترقی اور فلاح و بہبود کے منصوبوں میں بھی بھرپور کردار ادا کر رہی ہے۔

میجر جنرل بلال سرفراز خان نے بتایا کہ ایف سی بیواؤں کے لیے گھروں کی تعمیر، اسکولوں، مدارس اور بنیادی صحت مراکز کی بحالی، فری میڈیکل کیمپس، سولر سسٹمز اور آر او پلانٹس کی فراہمی، کھیلوں کی سرگرمیوں کا انعقاد، عوامی مسائل کے حل کے لیے جرگوں اور کھلی کچہریوں کے انعقاد جیسے اقدامات میں بھی پیش پیش ہے۔

انہوں نے کہا کہ ایف سی خدمت مرکز کے قیام اور نوجوانوں کی تعلیم و تربیت کے لیے رہنمائی جیسے اقدامات کا مقصد جنوبی بلوچستان میں دیرپا امن اور ترقی کو فروغ دینا ہے۔

یوم تشکر کے موقع پر خطاب کرتے ہوئے انہوں نے قومی اتحاد کی اہمیت کو اجاگر کیا اور کہا کہ کیچ کے عوام سیکیورٹی اداروں اور سول انتظامیہ کے شانہ بشانہ کھڑے ہو کر اپنی ذمہ داریاں بخوبی ادا کریں۔

سیمینار کے اختتام پر ’’کیچ سول لیزان کمیٹی‘‘ کے قیام کا اعلان کیا گیا، جو باہمی ہم آہنگی، مؤثر رابطے اور عوامی مسائل کے حل کے لیے ایک پلیٹ فارم فراہم کرے گی۔

سیمینار میں ارکان بلوچستان اسمبلی، مقامی سیاسی رہنما، سول انتظامیہ، سیکیورٹی اداروں کے نمائندگان، انجمن تاجران، وکلاء، ڈاکٹرز، دانشور، قبائلی عمائدین، پریس کلب کے ارکان سمیت زندگی کے مختلف شعبوں سے تعلق رکھنے والے افراد نے شرکت کی اور ایف سی کی کوششوں کو سراہا۔