باجوڑ میں ’آپریشن سربکف‘ کا آغاز، 16 علاقوں میں کرفیو نافذ

باجوڑ(ڈیلی اردو) سیکیورٹی فورسز نے ضلع باجوڑ میں شدت پسندوں کے خلاف منظم کارروائی کا آغاز کرتے ہوئے "آپریشن سربکف" کو باضابطہ طور پر شروع کر دیا ہے، جو 31 جولائی تک جاری رہے گا۔ اس آپریشن کا مقصد علاقے میں دہشت گردی کے خاتمے اور دیرپا امن و امان کا قیام ہے۔

ذرائع کے مطابق کارروائی کے دوران 16 حساس علاقوں میں روزانہ صبح 5 بجے سے شام 5 بجے تک کرفیو نافذ رہے گا، جس کے تحت شہریوں کو گھروں سے باہر نکلنے کی اجازت نہیں ہوگی۔ سیکیورٹی فورسز کی جانب سے داخلی و خارجی راستوں پر سخت نگرانی جاری ہے، جبکہ خلاف ورزی کرنے والوں کے خلاف قانونی کارروائی کا عندیہ دیا گیا ہے۔

انتظامیہ نے علاقے کے مکینوں سے اپیل کی ہے کہ وہ فورسز کے ساتھ مکمل تعاون کریں اور بلا ضرورت نقل و حرکت سے گریز کریں تاکہ کسی بھی ممکنہ نقصان سے بچا جا سکے۔

حکام کے مطابق شہریوں کی حفاظت کو مقدم رکھا گیا ہے، اور کسی بھی ہنگامی صورت حال سے نمٹنے کے لیے ہیلپ لائنز کو فعال کر دیا گیا ہے۔ آپریشن کی پیش رفت اور سیکیورٹی صورتحال پر مسلسل نظر رکھی جا رہی ہے۔