باجوڑ میں دہشتگردوں کے خلاف آپریشن شروع ، کئی علاقوں میں کرفیو نافذ

پشاور(ڈیلی اردو) خیبرپختونخوا کے ضلع باجوڑ میں دہشت گردوں کے خاتمے کے لیے سیکیورٹی فورسز نے 11 اگست 2025 سے ہدفی (Targeted) آپریشن کا آغاز کر دیا ہے، جس کے تحت بعض مقامات پر 12 گھنٹے جبکہ کئی علاقوں میں 72 گھنٹے تک مکمل کرفیو نافذ رہے گا۔

خیبرپختونخوا ہوم ڈیپارٹمنٹ کے نوٹیفکیشن کے مطابق، 11 اگست کو صبح 11 بجے سے رات 11 بجے تک خارمونڈہ روڈ، خار ناوگئی روڈ، خار پشت سلارزئی روڈ اور خار صدیق آباد عنایت کلے روڈ پر دفعہ 144 کے تحت نقل و حرکت پر پابندی عائد ہے۔

وزیراعظم کے مشیر برائے قبائلی امور، مبارک خان زیب نے کہا کہ "ماموند آپریشن کے دوران ضلعی انتظامیہ اور ڈپٹی کمشنر سے مسلسل رابطہ ہے، متاثرہ خاندانوں کو تنہا نہیں چھوڑا جائے گا۔ اسکولوں میں رہائش، خوراک اور دیگر بنیادی سہولتیں فراہم کی جا رہی ہیں۔"

مزید ایک نوٹیفکیشن کے مطابق، 11 اگست صبح 11 بجے سے 14 اگست صبح 11 بجے تک لاغری، گواتی، غنم شاہ، بد سیاہ، کمر، امانتا، زگئی، گٹ، غنڈئی، گاریگل، نیئگ کلی، ریگئی، ڈاگ، دامادولا، سلطان بیگ، چوٹرا، شین کوٹ، گنگ، جوار، انعام خورو، چنگئی، انگا، سفری، بار گٹکئی، کھڑکی، شاکرو اور بگرو میں مکمل کرفیو نافذ ہے، اور کسی کو بھی گھروں سے نکلنے یا سڑکوں پر آنے کی اجازت نہیں ہو گی۔

انتظامیہ نے شہریوں کو تاکید کی ہے کہ تمام ضروری امور صبح 10:30 بجے تک مکمل کر لیں اور پابندی کے دوران گھروں میں رہیں، بصورتِ دیگر خلاف ورزی کے نتائج کی ذمہ داری خود اٹھانا ہو گی۔

ذرائع کے مطابق، آپریشن سے قبل متعدد خاندان علاقہ چھوڑ گئے، جبکہ کئی فیملیز کو سرکاری کیمپس میں منتقل کیا گیا ہے۔ یہ نقل مکانی اس وقت شروع ہوئی جب جمعہ کے روز مقامی شدت پسندوں اور باجوڑ امن جرگے کے درمیان شدت پسندوں کو افغانستان واپس بھیجنے کے حوالے سے مذاکرات ناکام ہو گئے۔

ضلعی انتظامیہ کا کہنا ہے کہ 107 تعلیمی اداروں کو عارضی پناہ گاہوں میں بدل دیا گیا ہے، جہاں متاثرین کو رہائش، خوراک اور طبی سہولتیں فراہم کی جا رہی ہیں۔