بحیرہ احمر : ایرانی ساختہ ڈرونز کے پرزوں کی کھیپ یمنی فوج نے پکڑ لی

صنعاء (ڈیلی اردو) یمنی مسلح افواج نے دعویٰ کیا ہے کہ بحیرہ احمر میں بحری کارروائی کے دوران ایرانی ساختہ ڈرونز میں استعمال ہونے والے مختلف پرزوں پر مشتمل ایک کھیپ قبضے میں لے لی گئی۔

مسلح افواج سے وابستہ نیشنل ریزسٹنس کے ترجمان میجر جنرل صادق دوید نے سوشل میڈیا پر جاری بیان میں کہا کہ بحری فورسز کی کارروائی کے دوران یہ کھیپ ضبط کی گئی۔ ان کے مطابق کارروائی یمنی بحری فورسز کی سمندری حدود کی نگرانی اور مبینہ ایرانی سپلائی لائنز کو روکنے کی صلاحیت کی عکاس ہے۔

صادق دوید نے دعویٰ کیا کہ کارروائی سے حوثی باغیوں سے منسلک اسلحہ اور فوجی سازوسامان کی مبینہ اسمگلنگ کا نیٹ ورک متاثر ہوا ہے۔ انہوں نے یہ بھی کہا کہ اسمگلنگ کے راستوں کو محفوظ بنانے کے لیے مبینہ طور پر حملوں کی کوششیں کی گئی تھیں۔

نیشنل ریزسٹنس کے عسکری میڈیا کی جانب سے بعد میں ضبط کیے گئے سامان کی ویڈیو اور تصاویر جاری کرنے کا اعلان بھی کیا گیا ہے۔

یمنی حکومت طویل عرصے سے ایران پر حوثی باغیوں کو ہتھیار، فوجی سازوسامان اور تربیت فراہم کرنے کا الزام عائد کرتی رہی ہے، جبکہ یمنی اور بین الاقوامی فورسز اس سے قبل بھی ایسی کھیپ پکڑنے کے دعوے کر چکی ہیں جنہیں حوثی باغیوں کے میزائل اور ڈرون پروگرام سے منسلک قرار دیا گیا تھا۔